Nandi-Ndaitwah
a tumbalekwa nonzapo yuundokotola koTanzania
Omupeviprima osho wo ominista yomakwatathano gopaigwana Netumbo Nandi-Ndaitwah mEtiyali okwa li a pewa onzapo yuundokotola koUniversity of Dar es Salaam moTanzania. Omukuluntu moshikondo shokugandja uuyelele muuministeli womakwatahano gopaigwana Bertha Amakali momushangwapitithi okwa li a ti onzapo oya li ya gandjwa kuNandiNdaitwah omolwa iilonga ye a longa iiwanawa tayi tyapulwa kAanamibia, Africa nomuuyuni onga omukondjelimanguluko, omuleli osho wo omugameni guuthemba womuntu.
“Onzapo ndjika oya gwedha ko koonzapo odhindji ndhoka dha pewa omupeviprima uule woomvula. Okwa li a pewa onzapo yoGeneral English with study skills and English for Commerce okuza koEdinburgh Language Foundation, postgraduate diploma mopublic management okuza koGlasgow College of Technology, diploma in international relations okuza koUniversity of Keele noMaster’s Degree of Arts in Diplomatic studies,” omushangwapitithi tagu ti ngaaka.
Ogwa ti wo Nandi-Ndaitwah okwa li a yi molweendo lwopolitika mo1966 sho a li a wayimine oSwapo mepipi lyomimvo 14, moka a kala nokulongela ongundu moonkatu dha yooloka. Okwa li a ulikwa ominista miikondo ya yooloka mwa kwatelwa Uuministeli womauyelele netumomawi mombepo okuza mo 2005 sigo 2010, Uuministeli womidhingoloko nomatalelopo okuza mo2010- 2012, Uuministeli wiikwapondje 2012-2015 ossho wo uuministeli mboka ta lele ngashiingeyi womakwatathano gopaigwana, osho wo omupeviprima. Oshiputudhilo shika osha li sha gandja onzapo ndjika pethimbo tashi tyapula oomvula 50.