Mufhiwa isebeza isi kamulao
WINDOKO – Panka ya Namibia itolokile likezo za Pujojekiti ya kuyaha ya Mufhiwa kuba zakupahama, mi ikupile sicaba kusaitenga mwalitaba za kampani yeo. Panka ilaezi babazamaisi ba kampani kuambuka kueza cwalo, mi neize ilikile kubata bazamaisi bayona kalikweli zeñata. Kasamulaho alipatisiso moibelekela kampani kubona kana izamaelela ni mulao ozamaisa puluko ya masheleñi, lipatisiso lifumani kuli likezo zateñi kiza kuhula ka mihato.
Lipatisiso za panka libonisa kuli kampani ya Mufhiwa inga masheleñi kwa sicaba kakuba susueza kukenya babañwi. Kasamulaho akulifa pene yelikana N$ 200, limembala lisepiswa kulifiwa kuli balifelwe likoloti za mandu, kapa kulekelwa mandu amanca, kapa kuyandulula mandu abona.
“Purojekiti ya kuyaha ya Mufhiwa haifumani masheleñi kakulekisa libyana kwa limembala zateñi, mi masheleñi aliñolisa alikana N$200 kona asebeliswa kulifa limembala zene keni kale, ni bazamaisi ba kampani.
Kacwalo, haiba hakuna limembala zenca zekena, baba itengile mwakezo yeo habafumani masheleñi mi balatehelwa ki masheleñi aliñolisa,” nekubaleha sitatimende kuzwelela kusibuabui wa panka Kazembire Zemburuka. Na ekelize kuli panka imema bazamaisi ba Mufhiwa kuya kwa panka pili mazazi alishumi ka amane asika fela kale, kuyo lwanisa piho ya panka. “Muzamaisi kapa muyemeli wa purojekiti ya kuyaha ya Mufhiwa uka fiwa kolo yakufa piho yeñozwi kwa panka, kuli panka itatube kakuya ka mulao,” Zemburuka nabulezi. Nafelelelize kuli haiba kupalelwa kuya muyemeli kwa panka, katulo yateñi ika yema.