Likezo ze 2 800 zakubitelela mwalilimo zepeli
AKUNNIHOLE – Naha Namibia iboni kekezo mwalitaba za kubitelela, mi lipiho libonisa kuli likezo ze 2 818 za kubitelela neli bihilwe kuzwa Sope 2018 kutisa Muimunene unumwaha. Likwambuyu yabona za tikanelelo ya baana ni basali Doreen Sioka, nabonisize kuli hala ze 2 357 alikezo zeo neli ezizwe kwa basali ni banana. Mwanako yeswana sipokola sa Namibia nesi bihile likezo za bubulai ze 94, mi ze 54 neli ezizwe kwa basali ni banana. Zeo neli patuluzwi kanako ya kutabela lizazi la liswanelo za batu, kwa Akunnihole mwasikiliti sa Oshana.
Likwambuyu naize lipiho zeo libonisa kuli basali ni banana banyandiswa hahulu ki limembala za lubasi ni sicaba. “Kacwalo, kuna ni tokwahalo ya kutaleleza milao yeka bona kuli kuba ni cinceho sakata ni kuyaha lifasi le linde, lelina ni susumo, tukuluho, ni leli zwelapili,” nekubulezi Sioka. Likwambuyu naize taba ya bubangoki mwa mabasi iswanela kulwaniswa ki batu kaufela. Likwambuyu nabulezi hape kuli kuna ni tokwahalo ya kuyaha Namibia sakata, kuyahela cwale ni kamuso.
“Luswanela kubona kuli sililo sa baba talimana ni likezo zeo sa utwiwa. Kaufela aluna luswanela kuswalisana mwatwaniso ya likezo za kusa likanelela,” likwambuyu nafile kelezo. Sioka naize kutalima litaba za bubangoki mwa mabasi, naha Namibia ina ni kubabata ni kubukeleza litaba za mayemo ama masheleñi, sicaba ni liswanelo za sizo hala basali, baana, basizana ni bashimani mwahala libaka za maino.
Naekelize kuli naha ibata kufumana linzila ya kupunyuha mwa mawenge a Korona, mi kuna ni tokwahalo ya kususueza baana ni bashimani kukena mwa twaniso ya bubangoki hala basali ni banana. Naize lika zeo hali kandekiwa hande, baana ni bashimani mwa sicaba bakona kuba mitomo ya cinceho. “Luna ni kutahisa sibaka sa kuli baana bakandeke litaba za bubangoki hala basali ni kuli babe ni kabelo mwakubabaza kulikanelela kwa baana ni basali, kukuteka liswanelo za batu ni kufukuza litaba za bubangoki. Luna ni kuluta bashimani baluna kukuteka basali ni basizana mwalibaka zaluna,” nekubulezi Sioka.