Dalla oteshi enditha nawa mootundi dhoku mbaka iikuki
Omugundjuka gwomimvo dho pokati, a tseyika nawa Bella Dala ta tsikile okugandja ootundi dho kumbaka iikuki mOshakati.
”Onda dhewula aantu oyendji, ya pita po 500 omvula ayihe ndjika, ihe natango ondi li metifa lyootundi,” Omumbaki dhingi Dalla ta popi ngaaka.
Dalla ta ti, ndika olyo ethimbo ewaanawa okugandja ootundi oshoka kehe gumwe okwa hala oshituthi she nyanyanyu shi kale shi na uutoye wo shikuki.
“Nda hala okutya, iilonga yo kumbaka iikuki oyindji ethimbo ndika lyaDesemba aalongwa yandje otaya dhewuka nawa oshoka mesiku ohatu mbaka mo mo iikuki oyindji,” Dalla ta ti ngaaka.
Ta popi ta ti, ootundi dhe kadhina okanona nomukuluntu, ihe odha kehe ngoka e na ehalo lyo kutseya okumbaka iikuki, ko ndando yi li pevi lela.
“Onda tokola okugandja omalongo gwokumbaka ku kehe ngoka, oshoka onda longwa kaakuluntu yandje kutya, ngele to gandja oto mono oshindji, nuunongo ota wuyi pombanda,” Bella a fatulula.
Ta ti, oyendji oye li momagumbo oshoka oya itaala kutya ka yena oonzapo nenge ka yena iilonga. Ta ti, iilonga haayihe hayi pula oonzapo, ihe yimwe ohayi pula onkondo nuunongo.
“Ethimbo o paife lyokuthika postudio ya “Bella Dalla” wu mone ootundi tadhi xwaxwameke nokutunga onakuyiwa yo ye. Onkalamwenyo itayi kala we ngaashi paife wu li muyo, onkene thikama nena, Dalla ta kumagidha.
Agwedhapo ta ti, iituthi ohayi ningwa aluhe momukokomoko gwomvula, kehe esiku omuna kuume koye nenge omukwanezimo gumwe ta valwa, pe hala lyo kuya kokule, otaya kala taya yeya pu ngweye.
“Ootundi dho kumbaka iikuki ihadhi pula onzapo, kehe gumwe ota tambulwako. Elalakano ontseyo noku eta elunduluko moshigwana, omutumba ethete,” Omumbaki gwiikuki ta ti.
Maria Petrus, mOshakati paife ta ithanwa “Maria the Baker” okwa ti otiithana dhingi mo kumbanga iikuki mOngwediva ayihe konima a li a mono ootundi dho masiku gatatu ashike.
“Dalla okwalongandje okumbaka iikuki omvula ya zi ko muFebruali, ka kwa li ndishi noshikuku kutya ohashi tamekwa peni, ihe osha li sha pula ndje ashike omasiku gatatu. Paife ondina woo nangaye, okastudio kandje mOngwediva,” Petrus a fatulula.
Ta ti, omwedhi aguhe gwaDesemba otagu puko tambaka iikuki, oshoka okuna ookasitoma odhindji. Ta ti, omwedhi gwa zi ko okwalanditha iikuku yiituthi ya yooloka yi li 20.
Ostudio otayi adhika mOshakati, mOkandjengedi ya talelathana nombelewa onene yoSwapo.
Bella ta ti, oshituthi kaashina oshikuki kashi shi oshituthi. Ko maludhi agehe giikuki dhenga konomola 0812011144.