Presidente Touadera gwaCentral African Republic a hogolululwa
Presidente gwaCentral Africa Republic FaustinArchange Toudera okwa sindana ishewe oshikako shimwe shuupresidente uule woomvula ntano komeho sho a sindana oopelesenda dha pita 53 momahogololo ngoka ga li ga indakanwa kiikolokosha, shika osha ikwatelela kiizemo yopakathimbo mbyoka ya pitithwa mOmaandaha. Okakomisi komahogololo oka li ka tseyitha Touadera onga omusandani gwomahogololo gomasiku 27 Desemba, okakomisi taka ti okwa mona omawi ga gwana onkene omahogololo itaga shuna mo moshilongo shika oshiyamba mokawe noshingoli.
Touadera, 63, okwa kala nokunana nuudhigu okukutha ko oshilongo momake giikulo miitopolwa oyindji okuza sho e ya koshipundi mo2016, oomvula ndatu konima sho president Froncois Bozize a li a umbwa ko koshipundi. Omahogololo gopaupresidente oga li ga yi komeho nonando oongundu dhoolebele dha li dha kambadhala okuya moshipala konima sho Bozize a li a indikwa kompangu kaa kuthe ombinga momahogololo.
“Faustin-Archange Touadera, sho a mono omawi ogendji medhingoloko lyotango, a zi mo no 53,9% okwa ulikwa onga omusindani,” Mathias Morouba, president gwokakomisi komahogololo osho a lombwele iikundaneki ngaaka moshilandopangelo, Bangui.
Okwa ti konyala etata lyaahogololi moshilongo, nenge aantu ye li lwopo 910 000 oya li ya ishangitha noopelesenda 76,3% Iizemo yomahogololo gegumbo lyoontotwaveta ga ningwa esiku olyo tuu ndyoka otayi ka tseyithwa komeho, Morouba ta ti ngaaka.