and Oshiwambo
OUMINISTELI wehongo neenghulunghedi owa tula po omalandulafano okufya oshisho kutya ovanafikola ovo ve na ounghundi notashi dulika va etelwe oshiponga koCovid-19 oveli meameno.
Meennghundafana odo a ninga noNampa, omunambelewa omukulunhu moshikondo shelongo Sanet Steenkamp okwa ti ouministeli waye owa nyolela keefikola adishe moshilongo opo di tofe mo ovanafikola aveshe ovo ve na omaunghundi a yooloka.
“Otwa pula opo ovanhu aveshe ovo ve na omaunghundi ile veli komapango onhumba ile ongadi, tashi ulika tava pumbwa epango leli kalekelwa op ova tofwe mo. Ovahongi, pamwe nouministeli osho yo ovadai otava ka longela kumwe oku tala kutya otava ka kwafa ngahelipi ovanafikola ava,” Steenkamp ta ti.
Ta weda po kutya keshe oo ta fekelelwa ombuto yoCovid-19, ile a ningilwa omakonaakono ndele ta monika kutya oku ina –nande oku kale ita ehama, ina yak o kofikola.
“Otwa fikama apa kutya ounona ava vali popepi novanhu va monika ombuto, ile momaumbo avo muna ovanhu ve na ombuto, inava ya ko kofikola,” Steenkamp ta ti. Pefimbo lokuyandja ouyelele unasha noCovid-19, ominista yelongo Anna Nghipondoka okwa li a holola kutya omapekaapeko oo a ningwa okwa ulika kutya luhapu ounona ihava ulike omadidiliko oCovid-19.
“Fiyo opapa eefikola nhano moshilongo ashishe odali ta ponokelwa kombuto, ashike kapali nande okaana kamwe ka ehema ile ka ya meembete,” Nghipondoka ta ti.
Nghipondoka, ashike okwa yeleka kutya omunhu nande oku kale ita ulike omadidiliko ombuto, natango onghee ngoo ta dulu okui tandavelifa.
Pefimbo lokuyandja omauyelele omunista youhaku Kalumbi Shangula okwa ti ounona veli koshi yomido 10 lohapu ova talika ko veli unene moshiponga nohava kolwa koCovid-19.
Eefikola dongula okwa teelelwa di patuluke momafiku 26 Januali, omanga eefikola dopombada tadi ka patuluka mefiku 01 February. -Nampa