Museveni vati oye omufindani moUganda
OMUPRESIDENTE oo a kala koshipundi oule womido 35 moUganda Yoweri Museveni okwa findana natango omahoololo, nande ovakondjifi vaye tava ti oshidjemo shomahoololo osho kashi na oukwashili washa.
Museveni okwa findana konyala nomawi eepelesenda 59, omanga omukondjifi waye munene Robert Kyagulanyi a shivika nedina Bobi Wine a mona omawi eepelesenda 35.
Ashike Museveni ota ti omahoololo oo a ningwa mEtine oo amwe a li a valulwa pauyuki kuhena vali mondjokonona yoshilongo.
Ashike Bobi Wine okwa udaneka kutya otaka nyana ashishe pomutenya oku ulika oukwashili kutya omahoololo okwa li a vakwa, ngeenge ointanete oya olulilwa moshilongo.
Epangelo ola pata ointanete moshilongo eshi ku na omafiku manini opo ku ningwe omahoololo moshilongo, oshinima osho sha yembwa nai kovataleli vomahoololo. Tava ti oshinima eshi osha teya po elineekelo olo vali ve na moshidjemo homahoololo. Oministae imwe yepangelo oya lombwela oBBC kutya ointanete otai patululwa “paife.”
Bobi Wine pakuhokolola onghalo oyo ya kala po pefimbo lomahoololo okwa ti eumbo lavo ola li la kondekwa kovakwaita novaneumbo laye, mwa kwatelwa ye nomukadi kavali va pitikwa okupita mo meumbo, novatoolingundana kavali va pitikwa oku popya naye.
Ovanhu omilongo ova dipawa pefimbo lomaxwaxwameko omahoololo, neengudu deemhilameno oda kala tadi ti epangelo otali va ningile omatilifo.
Bobi Wine (38) okwa kala ta ti oku lele po ovanyasha ovo va hala epangelo lipe, nota kondjifa Museveni oo e na omido 76.
Eemiliona 5.85 omawi a findanwa nao kuYoweri Museveni, sheli kolelela kokakomisi komahoololo. Eemiliona 3.48 ovanhu ovo va holola Bobi Wine, Museveni okwa shuna koshipundi oshikando oshitihamano.