A dhipaga mumwayinamati
Omulumentu gwomimvo 27 moshitopolwa shaMusati okwa mangwa po kopolisi sho a tsu omumwayinamati nombele yokapi iikando ine sigo a si.
Omukuluntu gwopolisi moshitoplwa shaMusati Titus Shikongo okwa ti, oshiningwanima shoka osha holoka Omaandaha goshiwike shika potundi 19h00 yokomatango, pehala lyomaninwo momukunda Omulondo moshikandjohogololo shaTamanzi.
“Otaku hokololwa kutya nakufekelwa moshiningwanima shika shi nyanyaleka, ngoka anuwa e na uunkundi wopamadhiladhilo nokwa tseyika kutya omuntu gwandohotola, okwa li ya nyenyeta nomumayinamati ngoka tango,” Shikongo ta ti ngaaka.
Ta hokolola ta ti, aalumentu mboka okwa li ya tameke okudhengathana sigo nakufekelwa a kutha ombele yokapi, e ta tsu mumwayina nombele iikando iyali mombunda, lumwe mepunda nalumwe montulo.
Shikongo ta ti, opolisi kakwa li ya pewa uuyelele pethimbo ndyoka lyoshiningwanima, kutya oshike sha etitha omanyenyeto pokati kaamwayinathana mboka.
“Nakusa okwa tseyika nedhina Shefanya Dominika Tilinde, a yambukile momukunda omo tuu moka mwa ningila oshiningwanima shoka,” Shikongo a popi ngaaka.
Shikongo okwa kumagidha oshigwana moshitopolwa shaMusati ta ti, nashi kale aluhe tashi lopota iningwanima yoludhi ndoka kopolisi.
“Opolisi oyi lile po okukandulapo omaupyakadhi mokati koshigwana, ihe hakwiikuthila omatokolo momake gawo yene, ngaashi taya dhipagathana ngaaka,” Shikongo ta ti.
Ta gwedha po ta ti, aakwashigwana nayo naya kale taya lopotele opolisi uuna pe na omawupyakadhi goludhi ndoka, opo yi ye yi kwathele meendelelo.
Kehe omukwashigwana na kale e na oongodhi dhopolisi yomeendeelelo.
Shikongo ta ti, ota tsikile okukumagidha oshigwana shi longele kumwe nokwiikaleka kokule niinima iiwinayi.
Kundana okwa ndhindhilike omwaalu gwomadhipagathano gu li pombanda moshitopolwa shaMusati, nolundji ohaga holokele pomahala gwomanwino.