Omukainhu Omuthai a pewa omido 43 molwomapapyo a yemba ohamba

Omukainhu omukwashiwana waThailanda okwa pewa ehandu letukano lashiya ko inali pewa nale omunhu moshilongo omo molwaashi vati a nyana eehamba doshilongo kosocial media.

Omukainhu a li ha longele epagelo a shivika ashike nedina Anchan, vati haye naanaa a ninga omatukano oo, ashike vati okwa tuminwa omawi a popya nai eehamba doshilongo ndele naye tea tumine vali kovanhu vame.

Omunamido 63 ou ta ti ye okwa tuma ashike omawi oo, ashike ye ina tya ko sha kuo.

Oveta yaThailand yolèse-majesté, oyo tai indike opo eehamba dihatukwe, oili imwe yomeeveta doludi olo da kwata moiti mounyuni.

Konima eshi yali ya fuda po oule weedula nhatu, oveta ei oya tutululwa po vali, nelalakano oku ya moshipala ovo veli omhinge nepangelo olo tali lelwa keehamba, va kala noku ningwa omakangha oule fimbo.

Anchan okwa ti oku na ondjo eshi a tandavelifa omawi oo lwoikando 29 ko YouTube nokoFacebook pokati komudo 2014 no2015, osho omukalelipo waye wopaveta a lombwela oshikundaneki shoReuters onghela.

Motete okwali a pewa omido 87, ashike edi oda tetwa metata konima yoku dimina kutya oku na ondjo. Anchan oumwe womovanhu 14 ovo va pewa ehandu loludi eli konima eshi epangelo lopaukwaita laya koshipondi mo2014, nola ana kutya otali ka handukila keshe ou eli omhinge neehamba.

Ongudu yovanhu ava 14 otai tamanekelwa oku tula komalungula omawi a dja kongudu tai pula opo omavalulo apambaanga eehemba a yandjwa koshiwana.

Naku kwata omawi, oo oye tuu omupopi wewi olo le li tabulafanwa ye okwali ashike a pewa ehandu lomido mbali nokwa longela nale odolongo, noku dja mo. Eemhangu edi oda ningilwa konima yomivelo dapata molwaashi vati osho sha li tashi popiwa mo osha nyika oshiponga keameno loshiwa.