Omukiintu nohonda ye ya dhipaga
Omulumentu gwomimvo 23 okwa si eso lyiinyanyaleka sho a hahalwa noku tsuwa noombele, komulumentu nomiikintu gwe momukunda Oshuuga moshitopolwa shaShana. mugandji gwomawuyelele moshitopolwa shaShana Frieda Shikole okwa ti, oshiningwanima shoka osha holoka potundi 22h00 yuusiku.
Otaku hokololwa kutya omulumentu ngoka a dhipagwa okwa li a hangakanenwa komulumentu nomukiintu gwe, naashoka sha fala sigo omedhipago.
Shikole ta ti, olugodhi okwa li lwa tamekele tango pehala lyomanwino, ta li ithanwa Okalukanda kaKalukambe mOndangwa. Ta ti, naku fekelwa medhipago ndika gwomulumentu, okwa li a matuka po anuwa a kalopota oshiningwanima shoka komuhona gwe, nani naku dhipagwa okwa landula ko a ka tsikile olugodhi, a homata ekatana.
Otaku hokololwa kutya olugodhi olwa tsikile mepya moka, nomukulukadhi noka e li mohole nagumwe gwomaalumentu mbaka okwa idhopo molugodhi, anuwa nelalakano lyokugamena omulumentu gwe. Oya hangene omulumentu ngoka nekatana nombele, e taye mu dhipaga.
Nakusa okwa hulithile mpoka. Otaku hokololwa kutya, ekatana nombele lyalongithwa kaaholike mboka, iilongitho yomukulukadhi yokapana.
Shikole okwa ti, omukiintu ngoka okwa mangwa po kopolisi, omanga omulumentu gwe, ngoka a monithilwa oshiponga miikolokosha moka e li monkalo yi li hwepo moshipangelo shaNandjokwe, moka e li momake gopolisi. Edhina lyanakusa inali vula okupithwa shoka aakwanezimo kaya li ya tseyithilwa pethimbo opolisi ya lopota oshiningwanima shika. Omakonakono gwopolisi oge li metifa.
Moshiningwanima inaashifaathana Omukulupe gwomimvo 67 okwa si eso lyombaadhilila, sho a gwile momuthima momukunda Elamba moshitopolwa shaMusati. Omukuluntu gwopolisi moshitopolwa shaMusati Titus Shikongo okwa ti, oshiningwanima shoka osha holoka lwopotundi 18h00 yokomatango momudhingoloko gwaTamanzi.
Otaku hokololwa kutya omukulupe ngoka otaku fekelwa a li ta shuna kegumbo, e ta gwile momuthima. Olutu lwe okwa li lwaadhika momuthima ngoka, lwa kongwa mo kaanamukunda, sho ya landula ompadhi mpoka yahuulile. Oshiningwanima shoka osha holoka ashike konima yesiku limwe, sho olutu lwokanona komimvo 12 lwaadhika kooha dhomulonga tagu ithanwa Indipendence beach mOmbaye. Sha ikolelela kepeko lyopolisi okanona hoka okwa li kayi kefuta naakwanezimo ya ko Osoondaha.
Otaku hokololwa kutya okwa li ka kana, aakwanezimo inaya mona kutya okayi peni. Tayi ti, oya li ye shi lopota kopolisi, no ka li ka kongwa mo momeya.
Olutu olwa monika po11h00 yongula, Omandaha gwoshiwike shika.