Aanasikola ye na oCovid-19 itaya ehama
Nonando omwaalu gwaalongwa ye na oCovid-19 gwa lopotwa gu li pombanda moosikola unene dhomonooli, omukuluntu gwelongo moshitopolwa shaShana Hileni Amukana okwa ti, shoka inashi pumbwa okuhalutha oshigwana oshoka aalongwa itaya ehama.
“Oosikola opo dha tameke, onkene aanona yamwe okwa li ya gongala piituthi ya yolooka mpoka omukithi gwocorona hagu taandele mbala. Oyendji ocorona oya zi nayo mefudho,” Amukana ta ti ngaaka.
Ta ti, kashi shi uupyakadhi natango nonando otaya tsikile okukondololo onkalo yomukithi ngoka moosikola.
Amukana ta ti, omwaalu ngoka okwa li gwa pitithwa konima aanolongwa ya li ya tutswa, sho yamwe yomuyo ya li taya ulike omandhindhiliko gocorona, ihe itaya ehama.
“Katu na uumbanda natango, oshoka omukithi omo gu li momalutu getu nonando itatu ehama, onkene uunona wosikola pethimbo ndika nawu tsikile ashike okugwanitha po omalandulathano noompango dhokukeelela omukithi gwo Covid-19,” Amukana ta ti.
Omukuluntu gwelongo okwa kumagidha woo iikundaneki, yi kale hayi lopota tayi nengeneke, oshoka oonkundana dhimwe itadhi hokitha, ihe otadhi mbandameke.
Ta ti, aakuluntu ngele oyu uvu omukithi gwa ponokela mosikola yontumba mu na oyana, nena kegumbo omwenyo pehala otagu zi po, naashoka otashi ka etela aakuntu oyendji uupyakadhi.
“Pethimbo ndika uuministeli welongo ina wuya po nonkatu yontumba omolwomwaalu ngoka gwa lopotwa gu li pombanda, oshoka otu uvite kutya, aanona itaya ehama, ihe oya ninga ashike iihakanwa,” ta popi ngaaka.
Minista guundjolowele Kalumbi Shangula okwa kumagidha oshigwana shi taambe omiti dhokukeelela omukithi gwocorona uuna gwa thiki.
“Oshigwana nashi itulemo mokutaamba omuti ngoka, okugamena omalutu gawo gaa kwatwe komukithi ngoka,” Shangula a kumagidha.
Ta ti, nonando iipotha ya lopotwa otayi ende tayi shonopala, oshigwana nashi tsikile okugwanitha po oompango oshoka omukithi ngoka ohagu lunduluka ethimbo kehe.
Ta kumagitha oshigwana shi tsikile okuzala uumasika, kwiiyoga koonyala oshowo okupititha po ehala pokati komuntu nomuntu.