UN a yemba iiponokela ya ningilwa aatoolinkundana moUganda
IIGWANAHANGANO oya yemba iiponokela ya ningilwa aatoolinkundana moUganda, ya ningwa kiilyo yetanga lyegameno, ndyoka lya thigi aatoolinkundana yamwe ya mona iiponga.
Oya li taya lopota kombinga yoshilyo shompilamena shegumbo lyomutumba gwopashigwana Bobi Wine sho a li ta popi kombinga yomahepeko geyanagulo lyuuthemba womuntu moshilongo.
Opolisi oya ti etanga lyegameno olya li tali hanagula engungo lyaantu naatoolinkundana ya mono iiponga pamupya. Shika osha ningwa pethimbo pe na eikwatopomutima kutya oompilamena otadhi thindilwa kongudhi konima yesindano lyomahogololo lyaPresidente Yoweri Museveni, momahogololo ngoka iizemo inaayi taambwa ko koyendji.
Okavidio oka ulika iilyo yetanga lyegameno lyaUganda taya tidhaatidha ye ya dhenge niiti iile. Aalopoti yamwe oya li ya ehama, mwa kwatelwa iilalo tayi zi ombinzi momitse. Oshiningwanima shika shi nyanyaleka osha li sha ningwa moshilandopangelo Kampala, pondje ashike yoombelewa dhIigwanahangano dhuuthemba womuntu- UN Human Rights Office.
Iikundaneki opo ya li mpoka sho Bobi Wine a li e li mpoka sho a li noshilage naanambelewa opo a pule ya ninge omakonaakono ge na sha nomahepeko guuthemba womuntu. Ongundu ye oya ti aayambidhidhi ye yamwe kaye wetike noya ti yamwe oya dhengwa sho ya li moondjedhililo. Epangelo lyaUganda olya fa lya mbandapala kwaashoka tashi indilwa kuBobi Wine.
Mboka ya li poshiningwanima oya ti aakwiita oya li ye ya nomaloli, ye ya pondje dhoombelwa do-UN dhuuthemba womuntu moshilandopangelo, Kampala.
Omutoolinkundana gumwe okwa li a thaneke ethano lyoposhiningwanima shoka, tali ulike mbushe miilonga e na ombinzi tayi kunguluka okuza moshilalo shi li momutse.
Ope na omaipulo ogendji kombinga yaayambidhidhi yompilamena mboka yaa wetike. Yamwe mboka ya li ya mangwa oya ti oya li ya ningilwa omahepeko gokolutu.
Presidente Yoweri Museveni omasiku ngaka okwa ti aantu 300 oya li ya mangwa po sho ya taaguluka oompango noya longa iimbuluma.
Omupresidente nguka omunamimvo 76 okwa sindana oshikako she oshitihamano momahogololo gomwedhi gwa za ko, Bobi Wine opamwe nongundu ye yompilamena yoNational Unity Platform otaya ti omahogololo kaga li pawuyuuki.