Babeleki basunda katengo ka makwambuyu
Keto ya katengo ka makwambuyu ya kukwala kampani ya Air Namibia kusina kapelezo, itisize kucaula mwanha kaufela mi tutengo totu yemela babeleki totu beli netu fitezi kwapili mwataba yeo.
Kucaula mwanaha kaufela neku lukisizwe ki katengo ka NUNW ni Tucna, kaku caula mwamuleneñi mwa Windoko.
Bane bacaula mwaketelelo ya NUNW nebaile pili kwaofesi ya Swapo kuyo tambeka liñolo la linonge kumuñoli yomuhulu Sophia Shaningwa.
Sikwata nesi laela kuli likwambuyu wa makampani aluilwe ki muuso Leon Jooste asiiswe musebezi, kaku bulela kuli nabetekile sepo ya sicaba sa naha Namibia.
Sikwata nesi zwezipili nikuyo tambeka liñolo leliñwi kwa ofesi ya ngambela wanaha Saara Kuugongelwa-Amadhila.
Hana bala liñolo la linonge Ndapewa Amupanda kuzwelela kwa katengo kaka yemela babeleki ka Natau, ili kaka wela mwatasa katengo ka NUNW, naize Jooste na ipetuzi “yasakonwi kusepwa kacwalo halukeli kuzamaisa ofesi ya sicaba.” Amupanda na akaleza kuli Jooste nabetekile maata afilwe akubona kuli makampani aluilwe ki muuso ahula.
“Taba ya kuli Jooste naiketezi kuya ni kuyo ambola litaba za Air Namibia alinosi mwanaha ya USA, itoloka kuli nana ni mulelo wa kukwala Air Namibia,” neku akaleza Amupanda.
Nabulezi hape kuli katengo ka NUNW kaziba kuli kuna ni milelo yene filwe ku Jooste kamo kampani ya Air Namibia nekona kupulusezwa kuli ieze masheleñi, ili Amupanda naize likwambuyu naipulukezi, kungelela cwalo ni lipiho kuzwelela kwamacaziba zene lilifezwi masheleñi.
Jooste ulatuzi hañatañata kuli una ni kabelo mwa kampani ya West Air, ili yebihiwa kuli ina ni takazo ye zwelela kwahule yakuleka lisebeliso za Air Namibia.
Kasamulaho aku amuhela liñolo la linonge, Kuugongelwa-Amadhila naize uka isa lipilaelo koliswanela kuli liyo talimwa.
Kuugongelwa-Amadhila nabulelezi sikwata kuli muuso ubilaela hala naha, nikuli katengo ka makwambuyu kaka eza moka konela kuli takazo sakata yanaha ya silelezwa. Mwatasa katengo ka Tucna katengo ka Napa nikona neka cauzi kuisa liñolo la liñonge kwa ndu ya milao.
Mwaliñolo lene liya kusibuabui wa ndu ya milao Peter Kajtavivi, babeleki bakampani ya lifulai neba laela kuli katengo ka makwambuyu kabafe likalabo kaku talusa kuli kamaiso yetuna mwamuuso, neketile kukwala kampani yebona za lifulai mwanaha kusina bupaki sakata.
“Nelufitile cwañi famayemo acwana, yalutisize teñi kimañi, kimañi yana ngile keto ya kukwala Air Namibia, nebafitile cwañi faketo yeo?” nekubaleha liñolo la linonge lene li tambekilwe ki mueteleli wa katengo ka Natau Heino Jakobo. Liñolo la linonge neli amuhezwi ki Lydia Kandetu, ili muñoli mwandu ya milao.
Jakobo nabulezi hape kuli likopano za lipolitiki haliswaneli kulumelelwa kueza buiketelo bobutisa kozi kwa bayahi kaufela banaha Namibia, sihulu babeleki ni mabasi abona.
Babeleki neba laezi kuli muleo wa kukwala kampani ya Air Namibia kusina kapelezo ufeliswe, mi bazamaisi babate nzila ya kuli lisebelezo lizwelepili.
Neba laezi hape kuli ngambolo sakata ibe teñi ni tutengo totu yemela babeleki, nikuli bayemeli bandu yamilao bakete tutengo totu kabatisisa nikufa likelezo hala kampani ya Air Namibia.
Lipiho za masheleñi mwalikwelinyana zefelile, neli bonisa kuli mwakweli ya Muyana 2020 likoloti za Air Namibia nelilikana bolulelule babalalu (N$3 billion), hakubapanya ni sifumu sesilikana bolule bamyanda yelobañwi kabamashumi alobabeli (N$981 million).
Muuso mwalilimo zemashumi amalalu ulikile kupulusa kampani yeluilwe kimuuso, yene bonahala kutepelela mi mwalilimo zefelile nopompile masheleñi afitelela bolulelule balobapeli (N$8 billion), kulika kubata kupulusa kampani ya lifulai.