Oshituthi shomagongo itashi kala ko nuumvo
Oshituthi sho magongo shoka hashi ka lako omvo kehe, oku za poomwedhi dho petameko lyomvula, itashi ka lako nuumvo omolwa omukithi gwoCovid-19.
Dhoka odha popiwa kelenga enene lyUukwambi Herman Ndilimani Iipumbu.
“Onkalo itayi pitike oshituthi shika shidhumbulukiwe ngaashi shito, omolwa omangundumano ga indikwa,’’ Iipumbu ta ti ngaaka.
Ta ti, oshituthi shoka ohashi hiya aakomeho yoshilongo omalenga omanene moshilongo ashihe.
Oshituthi shoka ohashi gongalwa kaantu ye vule 6000, nonando epangelo olya kaninga omalunduluko gomwaalu gomangunduma, natango onkalo itayi keshi pitika.
“Oshituthishokaohatushiningiokukaleka po noku simaneka omuthigululwakalo. Ootatekulu yo nale ka kwa li yeshi okulesha, onkene okwa li haya tyapula omvo omupe pamukalo ngoka aluhe muFebuali,” Iipumbu ta fatulula.
Tashi ti, okwa li haya koneke kutya una taya tyapula esiku ndyoka, oye li momvo omupe.
Ndilimani ta ti, okwa dhidhilike kutya omuthigululwakalo inagu simanekwa we, agandja oshiholelwa ta ti, uuna omweenda eya megumbo, iimbale ka kwa li hayi suukulwa kaanona.
Ta ti, iimbale okwa li hayi tentekwa ashike mpoka, ye omukuluntu ta tala kutya oteyi ningi ngiini, oshoka haaluhe omweenda a etelela sha miimbale, ihe ethimbo limwe oheya okuhehela pa mukalo gu li ngaaka.
Oshituthi sho magongo okwa li shina okudhimbulukilwa kOmbalantu nuumvo.
Omagongo ohaga kolwa oku za moongongo ngele dha pi, moka hamu vulu woo natango oku za oshikunwa oshitoye tashi ithanwa oshinwa.
Maria Nakale gwomomukunda Oshipumbu shOmugongo okwa ti, nayo oya thigwa mewangandjo oshoka ka yena natango uuyele ngele otaya vulu okukola omagongo ga wo gwokulanditha.
“Omagongo ogena ongeshefa hayi endelele, oshoka ihaga tokwa kaasamane. Oomvo gwayi inatu landitha omagongo omolwa omukithi gwocorona,” Nakale ta ti ngaaka.
Nakale ta ti, okwa li halanditha omandini gaali nenge gatatu ngoka kwa li hage mupe oshimaliwa shithike N$1 500 mesiku.