Ethimbo lyomvula inali kuka – Hango
AANAFAALAMA monooli oya kwatwa komalimbililo osho omvula ndjoka ya li ya tameke okuloka nawa tayi ende tayi shonopala.
Ooyene yomapya oyendji ngashiingeyi oyi ikwete pomutima oshoka iilya momapya oya tameka oku sa, shoka tashi ya limbililike.
Omunafaalama Selma Ndeyanale gwomomukunda Onawushe okwa ti, oya kala shi li yena omukumo, ihe otagu ende tagu kana po.
“Otwa kala noku tanga kutya nuumvo otuna eloolo, onkalo yombepo okwa li tayi ulike kutya, nuumvo okuna ekuta, ashike paife iiwike iyali inaatu lokwa,” Ndeyanale ta popi.
Ta ti, omvula ngele yaningi ethimbo inaayi loka iilya oshowo iikwakulya yawo ya kuna otayi kukuta, etayi si po komutenya.
“Oyi hole ngeno tayi ko kele pamwe nomutenya oshowo omvula, ihe ethimbo ele unene lya pita po omvula inayii loka, “ta ti ngaaka. Ruusa Shilongo gwomomukunda Opoto okwa ti, omvula oye yuuvite ike yi li kuushimba.
“Omukumo opo ngaa guli, ihe natango hago nana. Oomwedhi dhika odho dhoku lokwa, okuna ashike omasiku omashona tu thike muMalitsa, ihe natango kandi wete ko iikego yomvula kegulu,” Shilongo ta popi ngaaka.
Ta ti, omvula ngeno okwa li tayi ya, ngeno nuumvo oyena iilya, oshoka oyalonga nuudhiginini.
Shilongo okwa ti, omvula ohayi kandulapo omikaga, ta ti ngeno otaya li nale omafuma, oohi, omahandangali niikwawo oyindji.
Omunongononi moshikondo shomeya Leonard Hango okwa ti, natango ethimbo lyomuloka oko lili, onkene oshigwana nashi kale shina omukumo kutya omvula otayi ya.
Hango ngoka e li wo Mayola gwelelo lyondoolopa yaShakati ta ti, omvula oya loka unene miitopolwa yokuumbangalantu woshilongo, ashike natango aanamapya naaniimuna konooli naya kele ye na omukumo kutya otashi vulika naye yaka mone omvula yili nawa.
“Onkalo yomvula moNamibia odhigu okutengenekwa, ngele taku ti omvula otayi loko, itayi loko shaafathana miitopolwa ayihe yoshilongo. Miitopolwa yimwe ohayi loko nawa sha pitilila, yimwe otayi lokwa kashona omanga yimwe itayi lokwa nande nande.
“Moshitopolwa shaShikoto namo omwa mona omulokwa omwaanawa. Ombinga yokuumbungantu nokuninginino inayi mona omata ga gwana, ihe omukumo opo gu li kutya otayi ka loka komasiku gwokomeho,” ta ti ngaaka.
Hango okwa kumagidha oshigwana shi kale shina omukumo kutya omvula otayi loko natango, oshoka ethimbo lomvula ina li pita natango, otu li mokati kalyo.