Opolisi yaSpain ya adha yamwe ya holama mololi yiiyagaya taya iyakele moEurope

Opolisi yaSpain mokakololo ka gama Africa konooli kedhina Melilla oya adha Aafrica yamwe ya holama meloli lyiiyagaya, gumwe oku li mongoma yu udha omutoko gu na uuzigo.

Okandoolopa Melilla oke li uushiinda naMorocco, nAafrica mbaka ohaya taaguluka okuya mokandoolopa moka noku iyakela momaloli giiyagaya ngoka haga ka ekelahi iikwauzigo kondje yondoolopa, ano mokati kaFrance.

Ehangano lyoGuardia Civil olya lopota kutya olya adha Aafrica ye li 41 ya iyakela meloli komunkulofuta gwaMelilla moka ya tula oomwenyo dhawo moshiponga nokuhondama moonayilona dhiiyagaya, miiyaha noshowo moongoma moka mu na omauzigo nomakende, ga tatuka.

Omulumentu gumwe okwa adhika kee wete mpoka e li, ta hala oku sa, sho a iyakele mongoma mwali uuzigo wiimeno. Otaku fekelwa omulumentu nguka a fudhile mo omuti ngoka gwa nika oshiponga kaantu. Sho a monika, aapolisi oya li taya ipula kutya okwa sa oshoka ka li ti inyenge, ashike konima yethimbo okwa ka monika kutya ota fudha.

Uuvideo wa thanekwa kaapolisi otau ulike omulumentu ngoka a tsima a lala a mwena a fa a sa, e ta tameke ta inyenge a fa ta kondjo nomwenyo nokonima okwa kuutumba, ashike ota monika a fa a piyagana.

“Omwenyo gwomulumentu nguka ogwa hupithwa, okwa li e li pokusa,” omupopiliko gwopolisi ta ti. “Sho a tameke okugalukila momwenyo okwa li a ngwangwana noonkondo, unene sho a mono a kalelwa komupolisi e na ombele, ashike omupolisi okwe mu lombwele kutya oku lile po oku mu gamena.”

Oontauki ndhika moMellila odhe ya mo dha ende nale moombautu ndhoka dha nika oshiponga uule woowili heyali sigo omo Iberian Peninsula, nodha li wo dha tokola oku enda monkalo ndjoka natango ya nika oshiponga oku ka thika pondingandinga yaSpain hoka kwa li taku falwa iiyagaya yi ka longululwe.

Omvula ndjika oyo ayike poMellila opwa kwatelwa oontauki dhi li 1,781, omanga momukokomoko gwo2020 mwa li mwa kwatwa oontauki dhi li 11,669.