Woo, Oshikukuta moKunene
Ovanhu noinamwenyo ove li monghuwo i na onghambe
OVAKALIMO vomomikunda dihapu koshitukulwa shaKunene ove li monghuwo i na onghambe eshi oshitukulwa shavo tashi twikile nokuha mona odula. Omikunda da dengwa neudo ongaashi Ondije, Otjinungwa, Okatumba, Kovipoza, Otjikongo naOtuherera.
Ovanamikunda ava otava ti ova dengwa pomutima neudo, nohava ende eendjila diledile va yuka kodoolopa yaPuwo opo va ka konge oikulya yoimuna yavo. Tava ti neudo inava mona omata odula ma wana.
Meenghundafana va ninga naSelma Gumbo, omutoolinghundana kouministeli womauyelele nomakwatafano ova popya kutya ova kanifa oimuna yavo ihapu neudo unene ngaashi oikombo oya fya molwoo oshikukuta eshi. Ovakalimo ohava ende va yuka kOpuwo shaashi oko kwa monika odula ya wana noku na omwiidi woimuna. Otava ti kutya epangelo ola pumbwa opo li ye mo moshikumungu eshi shoshikukuta manga inashi mana po oimuna yavo. Otava ti kutya kape na omwiidi woimuna, nomeva okunuwa kovanhu nokoimuna nawo kape na sha. Onghee ove na okweenda eendjila dile opo va ka konge omeva oimuna yavo, nomeva okunuwa nokulongifa meumbo shaashi eenhele apa hava mono shito omeva kape na sha vali. “Eshi u wete oikombo ei kai na omeva okunwa tuu nande, efimbo limwe ohatu i keendudu kokule opo tu ka konge omeva oikombo,” Tobias Munongo omukalimo womOtjikongo ta ti.
Tava twikile tava ti ouxupilo wavo owa iwa moshipala shaashi ihava mono vali omashini okulya nosho yoo ombelela ngeenge va dipaa oimuna yavo shaashi oimuna ihai li vali oikulya ya wana ngaashi ya kala shito.
Otava xupu ashike paife mokamaliwa kopendjela aka hava mono okudja kepangelo. Tava popi kutya ova taalela eshongo lakula shaashi oimuna yavo otai fi unene pefimbo loshikukuta eshi, onghee otava ti kutya eshi otashi eta oluhepo nondjala kuvo.
Kansela woshikandjohololo Opuwo yodoolopa okwa ti kutya ombelewa yaye oya lopota omukundu ou kouministeli wounamapya nomeva opo u kale wa yandja omeva okunwa kovanhu noimuna meendelelo.