Ekanka koFish Consumption lye ya pehulilo
Ehangano lyoNamibia Fish Consumption Promotion Trust (NFCPT) opamawe nehangano lyaaniilonga, oNamibia Food and Allied Workers Union (NAFAU) oya adha etsokumwe naaniilonga mboka ya ningi esiku mekanka.
Etso kumwe ndika olya adhika sho yamwe yomaaniilonga yoNFCPT ya yi mekanka momasiku 12 Febuliali 2021, sho ya mono kutya oonkundathana pokati kaNAFAU nehangano odha adha okwena kwa thita.
Aaniilonga oyali taya pula opo ya gwedhelwe koondjambi sigo opoN$1000 nosho wo ya gwedhelwe oopelesenda 25 kiifendela yomagumbo. Oyali wo ya pula opo ehangano liya futile oopelesenda 70 koshimaliwa shomakwatho gopaunamiti.
Momukokomoko gwoshimaliwa
shomumvo gwo 2021/22, aaniilonga oya pula opo mboka ye na oondjambi dhili mongundu tayi ithanwa Grade A, ya gwedhelwe noopelesenda 10, omanga mboka yeli poGrade B oopelesenda hetatu, naamboka yeli poGrade C oopelesenta hamano.
Moshigongi shoka ya ningile iikundaneki Amusahanga omukuluntu gwaNAFAU Jacob Penda okwa ti NFCPT otaka futa aaniilonga oshimaliwa shoN$6 500 molwaashi ya longa nawa. ON$3 000 yoshimaliwa shoka otayi ka futwa aaniilonga momasiku 12 Maalitse nenge manga esiku ndjoka inaa li thika, noN$3500 omo 12 Apiilili nenga manga omasiku ngoka inaaga thika.
Aaniilonga mboka inaa ya longa uule womvula, yo otaya ka pewa oshimaliwa sha ikolelela koomwedhi ndhoka ya longele oNFCPT.
Oya tsu wo kumwe kutya oondjambi dhili mongundu tayi ithanwa Grade A, otadhi kagwedhelwe noopelesenda 8, omanga mboka yeli poGrade B oopelesenda hamano, naamboka yeli poGrade C oopelesenta ntano, nomagwedhelo ngaka otaha tameke muApiilili.
“Iigwedhela yomagumbo yo tayi ka londa noopelesenda 2 dhoondjambi, naashika otashi tameke mu 01Apiilili 2021,” Penda ta ti. Ta gwedha po ishewe kutya aaniilonga mboka yeli mekanka otaya ka shuna kiilonga nokaape na oshilanduli sha sha.