Eikuthilo lyevi moGauteng tali yi moshipala egandjo lyomagumbo – Makhura
OMUPRIMIYA gwaGauteng David Makhura okwa ikanyuna omapopyo taga ningwa koongundu dhompilamena kutya okwa kwatela komeho onkalo yokwaagandja omayakulo gomalukalwa osho wo okwaalonga neitulemo na ina hala okutaamba ko omapuko ge guuhasha. Makhura okwa li a holoka komeho gepangelo lyopashitopolwa mEtiyali moka a li a taalela omapulo omadhigu okuza kongundu yo-DA no-EFF sho a longo nuunkundi moshikako she okugandja omayakulo kaakwashigwana, osho wo elelo lya nkundipala.
Omupoplikiko gwo-DA e na sha nomatulo gaantu, Mervyn Cirota okwa ti Makhura okwa li a ningi omauvaneko gomwago ashike konima yoomvula heyali e li koshipundi inapu longwa sha shomupondo.
Cirota okwa li a totha mo etembudho netulululo lyaakalimo onga oshitopolwa shoprograma yokuhwepopaleka onkalo yothina, okumana nokugandja omagumbo kaantu osho wo oprograma yokugandja evi mbala onga elelo lyopashitopolwa ndyoka lya ndopa okuninga.
Makhura okwa li a ti iilonga oyi li metifa okukwashilipaleka kutya ooprograma dhi na sha nokugandja omalukalwa kaakwashigwana otadhi endele ko. Ta ti uupyakadhi uunene wompumbwe yomagumbo owa etwa komagumbo gaa li paveta osho aantu taya mbombolokele mo.
“Naashi tatu ningi oonkambadhala dhekandulepo miitopolwa mbika, aantu onkene taya mbombolokele moshitopolwa shetu, mwa kwatelwa wo sho yamwe yomaanapolitika taya yambidhidha aakwashigwana ya ikuthile evi kuyo yene. Eukuthilo lyevi ndika olya kwatelwa komeho kaanangeshefa aanapolitika, yamwe mboka omo ye li momutumba nguka,” ta fatulula ngaaka.
Cirota okwa ti nkene tuu Makhura a yile koshipundi shuprimiya, okwa ndopa okugwanitha po omauvaneko ge.
Itani Mokwevho gwo-EFF okwa ti Makhura okwa li ta henuka omapulo sho aniwa a tindi okuyamukula omapulo ge gen a sha nonkalo ombwiinayi yoshimaliwa osho wo yokugandja omayakulo.