Omulilo gwa dhipaga oontawuki moYemen

Okuniwe uutile kutya omulilo ngoka gwa li gwa iteyele mokamba yoontawuki moshilandopangelo shaYemen, Sana’a, ogwa dhipaga aantu ya thika po30 noku ehameka ya adha po170, osho ehangano lyIigwanahangano lyo-UN Migration Agency (IOM) lya ti ngaaka, mokamba muka omu na unene oontawuki dha za koEthiopia.

Omulilo ogwe ya konima sho Saudi Arabia a tameke okuponokela oshilando shika okuziilila mombanda, nAahouthis ya li ya longitha oomisile okuponokela omapungulilo gomahooli moSaudi Arabia. Onkalo mokamba moka oya kala nale tayi nyanyaleke nomanga omulilo inaagu tukuka. Oontawuki osho wo aatonateli oyo yamwe yomaantu ya lopotwa ya hulitha.

Carmela Codeu gwo-IOM okwa ti aniilonga ye oya li taya gandja omayakulo gomeendelelo kaantu ye vule 170 mboka ya mona iiponga, naantu 90 oye li monkalo ombwiinayi noonkondo. Sigo oompaka osheetithi shomulilo inashi tseyika, ashike oshiponokela sha ningwa kuSaudi Arabia osha hanagula po omatungo ge li popepi nokamba ndjika.

Momushangwa, Aahouthi oya ti epuko otaye li pe IOM nIigwanahangano sho ya ndopa okupa oontawuki omahala ge li nawa, nenge ye dhi kwathele dhi shunithwe kiilongo yadho. Ayihe mbika kayi shi iinakugwanithwa yehangano ndika. Nonando Yemen e li mokati kiita itaayi hulu, oontawuki omayovi omilongo, unene okuza kolwiinga lwaAfrica ohahi kambadhala okupitila moshilongo moka omumvo kehe, nelalakano oku ka konga iilonga koSaudi Arabia.

Ashike iita oya pata oongamba noontawukiodhatindilamoshilongo shika shi li moluhepo, ondjala, omikithi niita.