News in Rukwangali and Oshiwambo
MEtiyali, Ngoloneya gwoshitopolwa shaShana Elia Irimari opamwe nookansela yiikandjohogololo moshitopolwa shaShana oya kundathana nkene ye na okugamena omahala guuluthilo.
Ookansela esiku ndyoka oya totha mo omaupyakadhi taga mbugaleke omahala gwomauluthilo moshitopolwa shaShana, shoka tashi ka kala uupyakadhi kaanafalama niimuna yawo, uuna ondjala ya thiki ko.
“Natu hulitheni po okwiihola mwene. Oohambo otadhi tsikilwa kehe esiku, mpoka wa li wa ende ohela hapo to ende nena oshoka ehala olya tendwa ko nale. Itaya ndhilaandhila yakwawo ihe otayi iningile pawulwawo,” Ngoloneya ta ti ngaaka.
Ta ti, oshitopolwa shaShana osha vundakana, naakalimo naya kuthe oshiholelwa koshitopolwa shaNdonga, oohambo dha wapala dhi li melandulathano.
Ookansela natango oya popi kombinga yomulilo ngoka gwa li tagu dhana onkandangala omumvo gwa yi unene momudhingoloko gUuvudhiya.
Irimairi okwa ti, epangelo okwa li lya longitha oshimaliwa oshindji kombinga yepeya.
“Otatu kutha onkatu yomeenedelelo okuyanda omawupyakadhi ga tya ngaaka,” ta popi ngaaka.
Omunambelewagwokoshikondo shuuministeli wiikwambuga okwa li a kumagidha ookansela ya tameke okugandja omalongo okupitila miikundaneki ayihe oshowo okupitila mooyene yoohambo opo oshigwana shi hulithe po okumbugaleka.
“Otwa li twa ndhindhilike kutya oshigwana kashi uvite ko esimano lyokukaleka po omwiidhi mombuga.
Ethimbo limwe oto adha aanahambo taya fike owina omolwomatompelo ga yooloka,” ta ti ngaaka.
Ta gwedha po ta ti, oshigwana nashi kale tashi opaleke ominkulo dhomagumbo gawo, okuyanda omulilo gu fike sigo omomagumbo gawo, uuna uupyakadhi woludhi ndoka tawu holoka.
Irimari esiku ndyoka okwa popi omawupyakadhi goombahu.
“Otatu kaninga omayindilo kuuministeli wuunamapya opo wu kale we tu ilongekidhila moshitopola shetu, uuna oombahu dha ponokele mOshana,” Irimari ta ti.
Omupoliko gwelelo lyaNdonga Mannetjie Kambonde okwa ti, kehe ngoka taka konga uulithilo koshitopolwa shawo okwa manguluka.
“Aantumbokatayakongouulithilo ohatuyashangaomadhinanomwaalu gwiimuna yawo. Shoka inaashi pumbiwa okutumba omwiidhi, ihe okulitha moshitopolwa shetu okwa mangulikila kehe gumwe,” Kambonde a popi ngaaka.
Kambonde okwa li wo a kumagidha oshigwana shi kale hashi tokola okukandula po omaupyakadhi thiluthilu opo ku yandwe omawupyakadhi monakuyiwa.