Omulumentu a ikanyuna mompangu kutya okwa dhipaga oyana yane
Ompanguyopombanda yaLimpopo oya uvu nkene omulumentu ta tamanekelwa edhipago lyoyana yane a li itaa vulu oku thitikinina oondila konima sho omukwanezimo a li e mu pula kutya omadhipago okwe ga ningila shike. Lucas Phasha, 52, ota tamanekelwa omadhipago goyana – Katlego, 9, Joyce, 7, Tshepo, 5, naAdel, 8, – mboka ya li ya adhika ya sa pomahala gaali ga yooloka moGa-Phasha-Selatole popepi noBurgerfort moLimpopo momasiku 17 Febuluali omumvogali. Ombangi yepangelo Raymond Phasha oya lombwele ompangu kutya he yuunona okwa li a ekele mo oondila sho a pulwa etompelo
lyokudhipaga oyana.
“Okwa gandja ombili nokwa tameke okulila. Nangame onda li nda tameke okulila,” ta ti ngaaka.
Raymond, ngoka e li okatekulu kaPhasha, okwa ti okwa adha hekulu a holama moZebediela popepi noLebowakgomo.
“Onda popya naPhasha okupitila mongodhi yayina esiku uunona wa adhika wa dhipagwa. Opo nda li pehala mpoka pa adhika aanona sho a dhengele yina, ashike oshoka oya li taya gandathana, onda kutha ko ongodhi,” ta ti ngaaka.
Raymond ta ti Phasha okwa li e mu lombwele mpoka e li, e mu pukulula noku mu lombwela kutya na ye oye awike.
“Okwa li a zi moluhwa a zala oshuta yomuhoka gwomakunde ndjoka a li a hula mo mbala ta ti kayi shi ye. Otwa yi pomukunda gu li popepi mpoka nde mu landele oombiila mbali nomakaya.”
Raymond ta ti Phasha okwa li e mu lombwele uupyakadhi mboka wa li pokati ke nomukulukadhi gwe ngoka anuwa hayi kondje.
“Okwa li a pula ndje ndi thaneke okavidio sho tatu
popi nosho nda li nda ningi. Konima yethimbo onda li nda dhimi mo okavidio hoka, ashike onda li ngaa nde ka tula komapandja gosocial media nando haakehe,” ta ti ngaaka.
Ohahende yaPhasha Lawrence Mkhize oya ti omulumentu nguka ina dhipaga oyana, ta ti kutya okwa telwa omwigwo.
“Moshitopolwa shaGaPhasha omu na omahilathano gaakwashigwana yomuuwa taya kondjele uuthemba woomina osho wo elelo lyopamuthigululwakalo. Omulumentu nguka nda
kalela po okwa li omuleli muyimwe yomoongundu ndhoka, onkene okwa itaala kutya okwa telwa omwigo,” Mkhize ta ti ngaaka.
Ombangi yilwe, Alfred Madutlela okwa ti Phasha, ngoka a li omushiinda she, okwa li e mu dhengele noku mu tseyithila kutya okwa dhipaga oyana yane noku ekela omalutu gawo pomahala gaali ga yooloka.
“Okwa li a lombwele ndje kombinga yaampoka pwa li omidhimba nokwa lombwele ndje ndi tseyithile nekulu lye kombinga yomaso gaanona mboka.”
Madutlela okwa ti uuyelele mbuka okwa li e u gandja mbala moshigwana nolukongo luunona olwa li lwa tameke.
“Omidhimba adhihe otwe dhi adha mpoka e tu lombwele. Ina lombwela ndje kutya aanona okwe ya dhipagela shike.” Kuyele, ombangi yepangelo Kgaugelo Mamogale, ngoka ha felefula nokufala aanasikola,okwa li a lombwele ompangu kutya okwa li a pewa elombwelo kuPhasha a fale oyana kegumo lye, esiku ndyoka ya dhipagwa.
Phasha, ngoka a li a zala odjiina ombulawu nokambindja komakonda okashunga, okwa li a ti ke na ondjo momadhipago agehe gane. Okwa kala nokushanga shoka tashi popiwa mompangu mokambo ke kopeke.
Omasiku omashona manga aanona inaaya dhipagwa, Phasha okwa li a yi komalungula hoka a li a ti nekulu lye oha ka konga iipala pondje. Iihokolola otayi tsikile.