‘Inamu sheka ovafi’: Malema a yemba “omavaya” taa sheke nakufya Zwelithini,
Omuleliwonguduyomhilamenho moSouth Africa Julius Malema okwa takela omunwe “omavaya” oo a tameka okusheka ohamba yOvazulu, King Goodwill konima eshi a xulifa.
Malema wongudu yoEFF okwa li ta popi pefimbo loshiongalele shoikundaneki mEtivali konima eshi ye novaleli vakwao vo-EFF va talela po ovakwapata vanakufya Zwelithini konghulumbala yedina Isilo Sama Bandla, sha landula efyo lohamba ei ya xulifa mEtitano. Malema okwa ti efyo la Zwelithini “ekanifo linene”. “Otwa li neemhata da kwata moiti nohamba di na sha nedu. Okwa li twa popya oinima i shi okupwilikinwa i na sha netukulo ledu. Fye mo-EFF otwa kala alushe twa itavela kutya eehamba odo ovatonateli vedu notwa pumbwa okulongela pamwe nado opo tu fye oshisho kutya edu ola tukulwa shili mondjila nola pewa oovene valo.
“Tatekulu ohamba okwa li a hafela onghalo yopaife yokutya otwa dja ponghatu yokutala ko ovalumenhu kutya ovo ashike tava dulu okukala ovaleli vopamufyuululwakalo nopaife otwa ninga oshiwana shimwe,” Malema ta ti.
Mokunyamukula komapopyo e li omhinge nohamba, mwa kwatelwa edopo metukulo ledu, Malema ine likwata moku ulika omunwe ovo inava fimaneka ovafi.
“Ohamba okwa li omunhu, kaya li oshimaliwa. Ino teelela a kale e holike kukeshe umwe. Onga ovanhu, otu na okutambula ko kutya haalushe hatu kala nomadilaadilo taa tu kumwe. Ashike fye onga Ovaafrica otu shishi yoo kutya osha puka okuningila oonakufya omutyanai. Ngee omunhu kwa li u mu hole, xwepo u mwene. Efiku efyo tali ku talele po ndele hatu ku ningile eshi to ningile mukweni, otaku ka tiwa katu na omitima.
“Natu taleni koilonga iwa ei ya longwa kohamba – momudingonoko nokokule. Ohatu lilongele ko ashike oinima iwa kovafi fye hatu pilamene oinima oyo ii va longa shaashi kave po apa ve liamene.
“Ovo ve liluka omapendafule ombili paife otava popyaana vo opo va kala opo ihava ti sha eshi ohamba ya li ina omwenyo. Fye katu na efimbo nomavaya ngeenge ove na eshi va hala okutya, okwa li ve na oku shi popya nale, kava li ve na okuteelela ohamba i fye, paife ita dulu okulipopila,” Malema ta ti.