Kawana a pitha omadhina gaamboka ya mona uuthema wokuyula oohi
Minista gwoohi noonzo dhomefuta Albert Kawana oshiwike shika okwa tseyitha omadhina gaaningi yomaindilo mboka omaindilo gwao ga tothwa mo noya pewa uuthemba wokuyula oohi mefuta lyaNamibia. Omaindilo ngoka okw ali ga ningwa momumvo 2018. Minista okwa ningi eigidho ndika kendiki lyomauyelele lyepangelo hoka a ti mokati kaamboka ya pewa uuthemba ye li 298, omwa kwatelwa ye li 85 mboka ya kala naye ye na omauthemba noya tulula mo omaindilo.
Aaningi yomaindilo ayehe kumwe oya li ye li 5,176. Kawana ta ti omauwanawa gaaniilonga nonkalo yeliko oyo ya li ya talika tango pethimbo lyokuhogolola mboka ya ningi omaindilo. Aaningi yomaindilo aape mboka ya pewa omauthembba oye li 213, omanga y eli 862 omaindilo gawo ga okelwahi molwaashoka inaya gwanitha po shoka sha pulwa. “Shimwe shomoniinima mbyoka ya pulwa okwali oku ninga eindilo lwakehe oludhi lwoohi lwa ithikamena nonando eindilo ndoka otali ningilwa ehangano limwe,” Kawana ta fatulula.
Ta gwedha po kutya oUniversiti yaNamibia oyo ya li ya pewa okontalaka yokutala nawa omaindilo naashika oshi li sha ningwa opo ku siwe oshimpwiyu kutya uuyuki owa longithwa. Minista ta ti uuninisteli we owa longa nuudhiginini oku sa oshimpwiyu kutya aanyasha, aakiintu, oonakulwa aakulu, aantu ya za momihoko dha li da dhinika, aantu taya lumbu nuulema, omalelo gopamithigululwakalo, aanasikola noshowo omalelo gopambepo nago oga pewa mo oshipambu moshikondo shoohi. Kawana ta ti shoka ngashiingeyi sha landula ko okutula iinima pomahala nokusa oshimpwiyu kutya eliko noonzo odha topolwa pauyuuki mokati kAanamibia na kayeshi owala aantu yontumba taya kala oyo aluhe taya tyapula omauwanawa goshilongo –ta gwedha po ta ti otaku ka ningwa omapekapeko ga kwata miiti.
Eigidhidho lyokuninga omaindilo gokuyula yula oohi olya li lya ningwa momasiku 24 Mai 2018, sha ikwatelela keigidho lyepangelo (Government Notice no. 96) nokaatendo oka ti-33 (1) pamwe nokatendo oka ti-33(3) koveta yoonzo dhomefuta onti-27 yomomumvo 2000.