France okwa dhipaga aakwashigwana inaya homata moMali –UN ta ti
Oshikuti sha umbwa muJanuali ketanga lyomewangandjo lyaFrance osha dhenge nokudhipaga aakwashigwana ye li 19 nosho wo aalumentu yatatu yali ya homata pethimbo lyohango ndjoka ya li moMali.
Ashike etanga lyegameno moFrance olya nukila pomutenya tali ti momasiku 3 Januali nuumvo, yo oyu umbu ongundu yaatsindumbo nepangelo mboka ya li ya homata.
France oku na omatanga gaakwiita ge li 5,100 ge li moshitopolwa shaSahel taga lwitha oolebele ndhoka taku tiwa odhi na ekwatathano netanga lyopaukulo lyoal-Qaeda, ndjoka ya imanga kumwe noIslamic State.
Iigwanahangano (UN) oya ningi omakonaakono konima sho aakwashigwana ya nyenyeta kutya edhakadhaka olyu umbu aakwashigwana pethimbo lyohango ndjoka ya li momukunda Bounti gu li pondingandinga yaMali.
Aantu ye li yatano mboka taku tiwa oye li iilyo yoal-Qaeda nayo omo ya li moshituthi moka.
“Ongundu ndjoka ya monithwa oshiponga kiikuti mboka ya umbwa aakwashigwanambokayelimegameno lyoveta yopaigwana,” UN ta ti.
“Ehepeko lyaakwashigwani ndika otali eta omaipulo omanene kombinga yomaihumbato gomatanga gwopakwiita monkalo ya nika iita,” UN ta gwedha ko.
Ashike France okwa gandja omushangwa ta ti ita tsu kumwe nomukalo gwa longithwa ko-UN oku inga omakonaakono ngoka.
France ta ti ye okwa thikama komushangwa gwe ngoka a nyola kutya aakwiita ye oyu umbu ongundu yaanamapowe ihe ina ya umba aakwashigwana.
Omakonaakono ga-UN oga li ga ningwa koshikondo shi lile po uuwanawa waakwashigwana moMali.
Aanambelewa koshikondo shoka oya li ya longitha omathano gokoosatelite, noya li wo ya talele po ehala ndyoka, e taya ningi oonkundathana naakwashigwana ye vulithe paantu ye li po400.