SA a indika elanditho lyoshikaliha pethimbo lyOpaasa - ashike oongeleka odha patuluka
OMALUNDULUKO, Ramaphosa ta ti, oga nuninwa okukeelela ompito yetaandelo lyekuthikuthi etitatu lyomukithi gwoCovid-19 mehuliloshiwike lyOpaasa – pwa ningwa omalunduluko gontumba ndele inaku longithwa ashike omukalo gumwe.
Uusiku wEtitatu, opwa li omalunduluko moSouth Africa, sho Presidente Cyril Ramaphosa a li a tseyitha kutya epangelo otali ka ngambeka kashona elanditho lyiikolitha ashike otali pitike omwaalu ogundji gwaantu ya gongale moongeleka.
Omilandu ndhika, Ramaphosa ta ti, otadhi lalakanene okukeelela etukuko etitatu lyoCovid-19 mehuliloshiwike lyOpaasa – moka omalunduluko ga ningwa momilandu ndhoka dhi li po ngashiingeyi.
Ramaphosa mEtiyali okwa li a tula po omilandu oompe ngele tashi ya kelanditho lyomalovu, mpoka elanditho itaali ka ningwa pomahala gokunwina uule womasiku gane. Ashike omangundumano ge na sha nongeleka oga pepelelwa sho omwaalu gwaantu gwa pitikwa gu gongale gwa gwedhelwa, omangundumano gaa shi gopangeleka nago wo oga pitikwa nomwaalu gwa faathana.
Ta fatulula omatokolo ngaka, Ramaphosa okwa ti: “Sho omalovu haga hwahwameke omaihumbato guuhasha, otatu ka tula po omangambeko pethimbo lyehuliloshiwike lyOpaasa. Okulanda omalovu itaaga nwinwa mpoka osha indikwa okuza mEtitano sigo Omaandaha. Omasiku ashike ngoka gane. Elanditho lyomalovu otali ka pitikwa pomahala gokunwa nogokulila, shi ikolela kolisensa yoye, sigo opotundi 23h00.
“Ethimbo lyopaasa olya simana pambepo, nokuya kiinyangadhalwa yomaitaalo gopambepo osha simana kaantu oomiliona. Kaakelesiti, okugongala okwa simana pethimbo ndika taya tyapula oshituthi shaPaasa. Aajuuda otaya tyapula Opaasa, nAamuslema otaya ka tameka wo kasiku nomwedhi gwawo omuyapuki gwoRamadan.