Okanona ke li ombangi medhipago lyaGeorge Floyd otaka ipe ombedhi sho inaake mu kwatha

Okakadhona hoka ka kwata okavideo kedhipago lyaGeorge Floyd ndyoka lya li lya eta opo uuyuni awuhe u li yembe oka ti oha kala aluhe taka iyala ombedhi sho ke wete inaaka ninga po sha shomupondo okukwathela. Darnella, ngoka ngashiingeyi e na oomvula 18, okwa li gumwe gwomaagundjuka yane mboka ya li ya gandja uumbangi mesiku etiyali lyompangu yaDerek Chauvin.

Okwa lombwele ompangu nkene a mono Flyod ta kondjo nomwenyo, te mu eleke nahe, mumwayinamati, aamwayinagona noohekulu oshoka ayehe oye na oshipa oshiluudhe.

Oshipotha shika otashi ungaunga nonkalo yokwaathikepamwe, okatongotongo kopalwaala osho wo opolisi tayi pitililitha oonkondo dhayo.

MOmaandaha, ompangu oya li ya uvu Chauvin, omupolisi omukulu nkene a li a tsu Floyd nongolo pothingo sho a li te mu manga po moMinneapolis muMai 2020. Aapanguli oya ti shika osha dhana onkandangala onene meso lye.

Oohahende dhomutamanekwa odha ulika kutya otadhi ka gandja uumbangi tawu ti Floyd okwa si kelongitho lyapitilila lyoshinima shontumba. Chauvin, 45, okwa li a ti ke na ondjo medhipago. Aanambelewa yalwe yatatu mboka ya li poshiningwanima shoka -Tou Thao, J Alexander Keung naThomas Lane – otaya ka pangulwa komasiku gokomeho.

Okuume yaali, Alissa, 18, naKalen, 17, oya li ya hingi taya yi koositola sho ya itsu moshiningwanima shika. Ayehe oya ndjandjukununa nkene ya li yaa na oonkondo dhasha sho ya tala Floyd nokonima okwa li ashike a lala mpoka, itaa kondjo we nomwenyo.

Ombangi yahugunina yesiku oya li Genevieve Hansen, omunambelewa gwakadhimamundilo ngoka a adhika itaa longo esiku ndyoka, okwa ti aanambelewa yopolisi oye mu indike a gandje omayakulo gopaunamiti ngoka ga li taga vulu okuhupitha omwenyo gwaFloyd.