Oshiwike shaanyasha otashi ka dhimbulukiwa sha yooloka mOshikoto
OMUNASHAPUNDI gwaanyasha moshitopolwa shaShikoto Martin Olembe okwa ti, oshiwike shaanyasha otashi ka dhanwa nokudhimbulikwa momukalo gumwe gwi ili.
Ongongahangano yaanyasha yoNational Youth Council (NYC), oya longekidha nokutopola oshiwike shoka shi dhanwe nokudhimbulikiwa miitopolwa ayihe 14, sho sha gandja N$30 000 kehe koshitopolwa.
Oshiwike shaanyasha otashi ka dhanwa oshikando oshi-14 kohi yoshipalanyolo ‘’Aanyasha itaya pitike ompito yomahepeko”.
Oshiwike shaanyasha otashi ka tameka momasiku 12-19 gaMai nuumvo, miikandjohogololo ayihe mOshikoto.
“Oshikondo shaanyasha moshitopolwa shaShikoto osha ti, kaye na etompelo lyokutyapula nenge lyokunyanyukwa, opo ya dhane oshituthi shoka, onkene okwiithana aanyasha noku ya futila oolefa osho wo oku ya pa iikulya niikunwa, itaku ya kwatha sha moonkalamwenyo dhawo,” ta ti ngaaka.
Ta gwedha po ta ti, oyena aanyasha oyendji otaya nu momithima.
Oosikola dhimwe kadhi na omihandjo, omanga aanyasha yamwe oya mana eilongo lyawo kiiputudhilo yopombanda, ihe inaya mona iilonga oshowo mboka ye na ohokwe yokutameka oongeshefa , ihe kape na iimaliwa yoku ya yambidhidha.
“Onkene okudhana oshiwike shoka pamukalo gwokulya kopepunda, otashi nkundipaleke omadhiladhilo gaanyasha, nokuulika okwaa ya simananeka omanga ya taalelwa komaudhigu ga tya ngaaka,” ta popi ngaaka.
Ta ti, oshikondo shaanyasha moshitopolwa shaShikoto osha longekidha okudhana oshiwike shoka niimaliwa mbyoka, okuyambula po onakuyiwa yaanyasha moshitopolwa.
“Otuna etengeneko thaneko lyoku tunga omuhandjo gwaantu yeli moluhepo, yena uunulema oshowo mboka yeli monkalo odhigudhigu. Ota tu tamekitha iimaliwa mbyoka okugongela sigo N$ 100 000 okutunga ehala ndyoka,“Olembe ta ti ngaaka.
Olembe okwakumagidha aanyasha opo ya gwongale mengathithi opo yeye ya gandja oshowo ya mono omalongo nkene yena okulwitha omahepeko ga telela oshigwana oshowo okulwithi omukithi gwoCovid-19 guli moka ti ketu.