Ndeevelo e na ohokwe yokulonga moikunino
“Ame ondi hole okulonga moikunino shaashi ondi hole oimeno, aa oo omaano nda pewa kuKalunga. Ondi na ohokwe yoshili nounongo woimeno. Ovanhu vamwe ova kala tava ti kutya oshikunino shange itashi i komesho, ashike inandi teka omukumo wokulonga.”
Aa omatumbulo aNdinaelo Alsina Ndeevelo, weedula 42 ou e li onga omunamapya e na oshikunino shaye mwene. Meenghundafana a ninga naKundana okwa hokolola ta ti oku na ohokwe nounongo wokulonga moikunino, nokukuna oikunomwa ya yooloka.
Ndeevelo oku li omukalimo womOshali popepi nOngha moshitukulwa shaHangwena, nokwa kala nokulonga moikunino oule weedula nhatu paife.
Moshikunino shaye oha kunu mo oikunomwa ya yooloka ngaashi omatama, eenyanga, omakeembidji noikunomwa ikwao yomaludi ahapu.
“Moshikunino shange omo handi mono mo oikulya younona vange ve li vatatu, mo omo handi mono noshimaliwa shokukwafela ounona vange ngaashi oku va futila ofikola, noshoyo eemhumbwe dikwao,” Ndeevelo ta ti.
Ndeevelo okwa ti okuhole okulonga oikulya yaye mwene, ashike kehole nande okukale ta xupu movalumenhu opo a mone oikulya.
“Ovakainhu vakwetu natu kaleni hatu longeni oikulya yetu vene, ndele haku kala omunhu wa teelela ashike omulumenhu e ku etele oikulya. Onghee ounyuni wopaife kauwa vali vakainhu vakwetu, otu na okukala atu longo vene opo tu xulife po onghalo ei yokuhepekwa kovalumenhu momaumbo ngeenge twa hala ashike muvo ve tu pe oshimaliwa noikulya,” Ndeevelo ta ti.Ndeevelo oku li yoo a yandje nomadeulo oshali kounona novanyasha ile ovakulunhu a va vena ohokwe yokulilonga kombinga yoikunino.
Okwa ti okuna ondjodi opo a tote po ofikola yeye ei tai kala tai yandje omodeulo kovanhu ngeenge va hala okulihonga ounamapya.
“Epangelo ola pumbwa okweeta po eprograma dihapu moitukulwa aishe moshilongo opo ovanyasha va dule oku kufa ombinga mounamapya nokumona ounongo nghee vena oku kuna oimeno yayooloka,” Ndeveelo ta ti.
Okwa ti ota twikile nokulonga noudinini nonande a taalela omashongo. Yee ta ti omutumba iha wetaasha, shoo sha nakulya osha nakulonga.