Omukulupe a mangwa po sho anuwa a adhikilila ta kwata okanona komimvo heyali koonkondo

Opolisi moshitopolwa shaShikoto oya kwata po omukulupe gwomimvo tadhi tengenekwa dhi li lwopo-80 nasha, sho anuwa a adhikilila ta kwata okanona komimvo heyali koonkondo momukunda Okalevona moshitopolwa omo tuu moka.

Sha ikwatelela kepeko lyopolisi, oshinigwanima shoka osha holoka Etitano lya zi ko, potundi 18h00 yokomatango momudhingoloko Oniipa.

Otaku hokololwa kutya oshiningwanima osha ningilwa megumbo lyomukulupe gwomimvo 84, moka anuwa a li a adhikila ta kwata okanona hoka koonkondo.

Omukulupe ngoka ta fekelelwa ekwato koonkondo oha zi puushinda negumbo moka hamu zi okanona hoka, ihe inaya pambathana.

Moshiningwanima shimwe inaashi faathana, olutu lwomulumentu gwomimvo 23 ngoka taku hokololwa anuwa omunasikola posikola Elite mOndangwa okwa li lwa adhika miihwa mOndangwa. Opolisi oya ti, olutu ndoka okwa li lwa adhika konima yokandunda kedhina Iihongo, lwa tsuwa mombunda noshinima kaashi shiwike.

Otaku hokololwa kutya omulumentu ngoka natango okwa tsuwa lwaali montulo oshowo mokwaako kokolulyo.

Okwa tseyika nedhina Eliaser Showa, aakwanezimo oya tseyithilwa.

Opolisi otayi indile moshigwana shi longele kumwe nayo, opo ngele ope na ngoka e shi omuntu e li mekwatathano lyedhipago nenge a dhipaga omulumentu ngoka a lopotele opolisi yi li popepi naye.

Opolisi oya lopota oshiponga shi nyanyaleka shoka sha holoka uusiku wOlyomakaya ga zi ko, moka mwa sile omukuluntu gwoshitayi shombaanga yo-FNB mOmuthiya Toivo Panduleni Mbeeli gwomimvo 41.

Otaku hokololwa kutya iihauto mbyoka anuwa okwa li yi ipumu mumwe, moka natango mwa sile omulumentu gwomimvo 38, Abner Shindondola.

Opolisi oyi li metifa okukonaakona shoka sha etitha oshiponga shoka. Aakwanezimo ayehe oya tseyithilwa.