Ovakulupe mOdibo va tungifa etala lopendjela

Ovakulupe vomomukunda Odibo moshikandjohoololo shaShikango, moshitukulwa shaHangwena ova tungifa etala lipe lavo lokukwatela opendjela paife.

Meenghundafa a ninga naKundana kansela woshikandjohoololo shaShikango Esther Ndatala Nghidimbwa okwa hokolola ta ti ovakulupe ava ova ongela oshimaliwa shi fike N$15 000 opo va dule okutunga onhele yavo yokukwatela opendjela.

Nghidimbwa okwa yelifa ta ti oshimaliwa eshi sha tunga etala eli osha ongelwa kovakulupe vomomukunda Odibo moshikandjohoololo shaShikango.

“Ovakulupe ava ova kala ve na omhumbwe yetala lokukwatela opendjela, va eta po ediladilo opo keshe omukulupe a kale ta yandje eedola N$50 oule weemwedi nhee opo va ongele oshimaliwa vo va shiive okutunga etala lavo,” Nghidimbwa ta ti.

Nghidimbwa okwa ti ombelewa yaye oya tambula ko omadilaadilo aa opo va ongele oshimaliwa shetala lokukwatela opendjela.

Kansela okwa hokolola ta ti oshi li ehafo linene kovakulupe ava eshi va mona onhele yavo paife.

“Etala eli oli li pashinanena shaashi ola tungwa la kola neenghono. Ombelewa yange nayo oya yambidida etala eli nokuyandja oitenda ya kola opo i tulwe ko opo etala li kale la kola liha we po komhepo. Onghee naame onda longifa oshimaliwa shi fike N$1 000 eshi nda yandja opo shi ka lande eengudi doitenda da kola,” Nghidimbwa ta ti.

Kansela okwa ti moshikandjohololo shaye omu na eenhele di li hetatu a hala ngeno adishe di kale da mona omatala okukwatela opendjela a kola ngaashi naanaa etala eli latungwa mOdibo.

Nghidimbwa ota indile kOvasamaria Ovanamutimanghenda opo va yambidide ovakulupe ve va landele odalate opo etala li shiive li ye oluumbo, opo pa kale pe na eameno.

Pexulilo okwa pandula ovakulupe eshi va longela kumwe nokukufa etokolo lomondjila eshi va longa noudiinini okutungifa etala lavo eli.