Aakiintu yamwe oya hala okuhokanwa oyendji
NONANDO ekotampango lyaNamibia olya pitika omulumentu gumwe a hokane owala omukiintu gumwe, aakiintu yamwe oya holola kutya oye na ohokwe noya hala ompangu yi pitike opo ya hokanwe oyendji.
Helena Micheal gwomoWindhoek okwa ti, ke li nando ompinge ngele aakiintu taya hokanwa ya pita puuyali komulumentu gumwe.
“Aantu oyendji kaye na ontseyo kombinga hondjokana yaakiintu yaali nenge ye vule po. Mondjokana moka kamu kala omananathano pokati kaakulukadhi, ihe ohamu kala uuthikepamwe okuza komusamane,” a fatulula ngaaka.
Ta ti, shika aluhe ohashi fatululilwa aakiintu ayehe taya yi mondjokana moka, onkene ombili ohayi kala po, nonando kehe gumwe oku na egumbo lye naanona ye mehala limwe.
“Ondi na eyitaalo kutya ondjookana ndhoka ohadhi humitha komeho ezimo. Sho osho shoka Aafrika ya kala ye na eyitaalo lyokuthigululapo aakiintu yaamwayinamati opo ezimo kaali ye kokule,” ta ti ngaaka.
Ta gwedha po ta ti, poompito odhindji, kape na eyooloko oshoka natango aasamane ohaya vulu okuya kaakiintu yamwe nonande inashi pitikwa, shihwepo shi kale tashi ningwa paveta.
Sylvia Matias okwa ti, oku li ompinge noshinima shi li ngaaka oshoka aakiintu yamwe ihaya kala moshili, yamwe otaya vulu oku itaala petameko, oshoka okwa hala omaliko nenge a hala ondjokana.
“MOshiwambo ohaku ti, nyamunkweni iha hambelelwa. Shoka oshoshili kape na esiku wu kale wu hole nyamunkweni, ngaashi wu li nomumwanyoko,” ta popi ngaaka.
Ta ti, shoka otashi eta evundakano momazimo, itamu kala we mu na ombili.
Ta gwedha po ta ti, omulumentu ngoka pokati kaakiintu ye mboka, ope na wala ngoka e hole po unene, itashi vulika ya kale e ya hole shi thike pamwe.
Titus Thikameni gwomOutapi okwa ti, edhiladhilo ndyoka ewanawa, naashoka otashi ka galula aasamane mboka ya tembuka momagumbo kaashi li paveta, neteyo lyoondjokana otali ka shonopala.
“Kandi wete ngele ope na omulumentu ta kala e li ompinge nasho, oshoka otashi tu mangulula, nomawupyakadhi gwokuya pondje itaga ka kala po lela,” Thikameni ta popi ngaaka.