Aanamapya ya mona eteyo ewanawa
NONANDO aanafalama yomomapya ya kala ya taalela omaupyakadhi ngaashi oluteni, oshipahu, okadhila nokapuka tayi hanagula po iiya momapya, otaya pandula oshoka oya mona eteyo ewanawa.
Martha Micheal gwomomukunda Onaanda okwa ti, oyali ya sholola oshoka kehe ethimbo omapya gawo ogali taga ponokelwa kiipuka mbyoka hayi tuka mombanda, ka kwali yeshi ngele otaya thigilwa po sha.
“Omagalikano getu ogu uvika kuTate megulu, nonando kwali twa taalela omawupyakadhi ngoka ethimbo alihe, otwa likola iilya oyindji momampya getu nuumvo,” ta ti ngaaka.
Ta ti, inashi kala oshipu, ihe oya kambadhala mpoka taya vulu okutidha noku dhipaga iipuka mbyoka.
“Ota tu pandula natango uuministeli wuunamapya mboka wa kala tawu tu yambidhidhidha okutsinina iipuka mbyoka kaayi tsikile okulya iilya yetu,” ta popi ngaaka.
Lydia Shoolongela gwomomukunda Onaushe okwati, okwatameke okuteya iilya ye oshiwike sha ziko, ihe sigo ompaka ota pandula oshoka oshipale she oshuudha nale iilya nonande ina mana okuteya. “Nuumvo otwa longa shili twii tulamo. Ngeno okwali iilya yetu yimwe inaayi lika po kiipuka mbyoka yali ya ponokele omapya getu, ngeno se aakengeli,” ta popi yeta yolo.
Shoolongela okwati, mepya lye okunamo ombinga yoshifukwa, shoka hakutha oofukwa taka landitha.
Ta ti, oofukwa dhoka alanditha sigo oompaka, odhe mupe oshimaliwa N$4 000 shoka alongitha okuyambidhidha aanona ye ya shune koosikola.
“Ngele nda mana okuhwa, andi kalanditha iilya yimwe ndi mone natango oshimaliwa shandje, omanga yimwe tandi yi siikilile,” ta ti ngaaka.
Okwa ti, iilonga yomepya ohayi mweetele oshimaliwa.
Ta ti, kehe shoka talongo mepya, oha topola yimwe oyo megumbo omanga yimwe taka landitha.
Silka Malakia gwomukunda Elim okwa ti, nuumvo omvula oyeya kwatoka, niilya yawo yimwe okwali yaadhika ya sa komutenya, naambyoka yali yaadhika inaayi sa, ya hupupo, ka yishi we iiyamba.
“Okwali twalonga shili nuumvo, ihe iilya yimwe oya sa po. Ita tu tuku Kalunga oshoka otwa mona mo ngaa, mbyoka ta tu vulu okulya,”ta ti ngaaka.
Malakia okwati, nonando iilya ye, kayishi lela oyindji, okwa likola mo ngaa mbyoka ta vulu okulya, ihe ineyi nyanyukilwa nawa.