Va pewa eedjapo nomakopi eshi ve shi endifa nawa
Ovanafikola novalongifikola va dja moshitukulwa shaShana ova pewa eendjapo nomakopi eshi ve shi endifa nawa moilonga yavo omudo wa dja ko. Ovanafikola ve li 48 ova pewa omakopi eshi va pita nawa omakonaakono avo ondodo onhi10, onhi-11 nonhi 12.
O map ole o kw a pew ao van afi kola dingi ava va pita nawa oilongwa yavo yomudo wa dja ko.
Koshiindingili eshi okwa li k una o mu ku lunhuw el on go moshitukulwa shaShana Hileni Amukana noshoyo ovakulunhu voikandjolongo yomoshitukulwa shaShana.
Amukana okwa pandula ovanafikola aveshe novalongifikola eshi va longa noudiinini omudo wa dja ko. Okwa twa ovanafikola omukumo ta ti eli olo efimbo liwa kovanafikola vondodo onhi11 nonhi-12 opo ve litule mo moilongwa yavo yofikola shaashi ova taalela omakonakono a kula axuunina.
Okwa ti elongo olo oshipatululo shonghalamwenyo, onghee ovanafikola ova pumbwa oku litula mo moilongwa yavo yofikola opo va pite va ka ninge ovanashilonga vokomongula.
Amukana okwa ti kape na vali efimbo tuu nande, onghee efimbo opaife lokulonga noudiinini.
“Ohandi kunghulile ovalongi aveshe vomOshana opo va twikile nokulonga nelitulemo moilonga yavo unene tuu ovalongi vondodo onhi-11 nonhi-12 ova pumbwa okukala tava kwafele ovanafikola ava ve na oupyakadi moilongwa yavo manga inava tameka okushanga ekonaakona lavo,” Amukana ta ti.
Amukana okwa ti ovanafikola ava inave shi endifa nawa moilongwa yavo nava kufe ko oshiholelwa kuvakwao ava valonga nelitulemo opo va mone omapole.
Omukulunhu welongo okwa popya yoo vali kombinga yombuto yoCovid-19 ta kunghulile ovanafikola novalongifikola opo va twikile nokuliufa komalombwelo efimbo keshe unene tuu efimbo eli loutalala.
Okwa ti ovalongifikola okwa ti nava kale ve na elalakano lokulonga nondjungu nokukwashipaleka kutya ovanafikola vahapu otava ka pita noidjemo iwa.
“Onda hala oshitukulwa shaShana osho shi kale dingi ngeenge tashi ya mokupita nawa, onghee natulongeni nondjungu nelitulemo,” Amukana ta ti.