A dhengwa oomvula 1 088 konima yekumba
Omukwatikoonkondo kamana ngoka a kala ta ngwangwameke oshigwana moshitukulwa shaPretoria okwa pewa oonkalamwenyo ntano noomvula 1,088 konima yekumba omolwa iilonga yuudhudhu mbyoka a longo.
Ompangulilo yopombanda moNooli yaGauteng oya tokola kutya oomvula dhegeelo ndhoka dha pewa omulumentu nguka nadhi ende tadhi itsikilile, ihe inadhi endela pawe. Shika osha hala kutya, omulumentu nguka okwa pewa konyala oomvula 1,300 mondjedhililo.
Omupanguli Mosopa okwa gandja egeelo kuSello Abram Mapunya omolwa omakwatokoonkondo, oku teya omagumbo noongeshefa, osho wo omunyekwa kwa homatiwa noku ehameka aantu komalutu owina.
Omunamimvo 33 nguka okwa kala noku monitha aantu iihuna miitopolwa ngaashi shaAtteridgeville, Mamelodi, Olievenhoutbosch naSilverton okuza pomimvo dho2014 sigo omuMaalitsa 2019 sho a monika ondjo mompangu.
Pethimbo ta gandja egeelo Mosopa okwa ti: “ita ndi ka gandja nande oomvula dhegeelo tadhi endele pamwe, oshoka iikulumuna mbyoka ino yi longa pethimbo limwe. Pethimbo omutamanekwa a tameke oku longa iimbuluma mbyoka ka kwali ha ningile iihakenwa ye omatilitho. Ashike iikulumuna mbika oya koko sho a tameke ihaaningi we omatilitho, ihe okwa tameke oku kala teya tsu noombele nonooskulufu. Yamwe okwe ya dhenge noohamala.
MoPhomolong okwa hepeke aantu mboka haya kala momalukandainaagalongekidhwa. MoNellmapius, okwa ningi aanto mboka haya kala momagumbo goRDP iihakanwa ye. Shoka otashi ulike kutya oku na mboka ha kala la hala oku ehameka. Oha landula noku ilonga nawa aantu uulethimbo omanga ineeya pontokela. Shika osho tashi ulike kutya oku li omukwati koonkondo kamana oshoka omukalo ngoka ha longitha aluhe owa faathana.” –Sowetan