Eefamili nhee moWalvis Bay da fiwa poluhaela kondalu

Eefamili nhee moWalvis Bay oda fiwa pomutenya eshi omalukalwa avo a hanaunwa po komundilo. Oshiningwanima eshi osha ningwa Omaandaxa efimbo longula molukanda Kuisebmund, moWalvis Bay.

Omupopiliko wopolifi moshitukulwa Erongo Ileni Shapumba okwa hokolola ta ti omundilo owa tameka tete kobashu imwe nokonima owaya ende fiyo tau kwata eembushu dikwao di li nhatu. Okwa hokolola ta ti ovanhu ova kanifa omaliko avo eshi a pila meebashu omo. Shapumba okwa ti kape na nande omunhu a kanifila omwenyo poshiponga eshi shomundilo, ashike ope na omukainhu umwe a pya kombuda a ninga oipute. Okwa ti omukainhu oku li monghalo iwa mopaife ngaha, nokwalekelwa mo moshipangelo paife. Meenghundafana a ninga naKunduna Julia Thomas oye umwe woomwava ve na eebashu davo da pya po komundilo nokwa hokolola ta ti ova kanifa omaliko avo ngaashi oikulya, oikumbafa, eembete, oikutu nosho tuu oinima yomeumbo ihapu. Thomas okwa ti mombashu yaye omwa xupa okaana ke na eemwedi mbali, omanga mobashu imwe okwa li mu na okaana ke na eemwedi hetatu. Okwa hokolola ta ti omundilo eshi wa tameka ova endelela opo va kufemo ounona vavo, elao linene kape na nande okaana ka pya komundilo.

“Eebashu detu oda pya po filufilu onghee katu na vali apa hatu nangala. Out na nounona vashona kaave na oikutu shaashi oikutu yavo oya pila meebashu,” Thomas ta ti.

Onghee Thomas okwa indila epangelo opo li va yambidide noikulya, oikumbafa noikutu nonhele apa tava kala tava di shaashi ova taalela eshongo lakula paife.