Oyendji otaya hala oopolota mOshakati
Mayola gwondoolopa yaShakati Leonard Hango okwa ti, nonando oyi ipyakidhila okuopaleka nokulongekidha oopolota kOnawa, Othingo oshowo Ompumbu ya tembudhile ko aakalimo yamwe okuza momalukunda, aantu oyendji natango otaya ningi omayindilo gomahala.
“Ethano ewanawa sho aantu taya ningi omayindilo gwomahala gawo yene, naashoka otashi tu pe omukumo okulongekidha etengenekothaneko ewawanawa monakuyiwa, oshoka otu wete kutya aantu oyendji oye li mompumbwe yomalukalwa,” Hango ta fatulula.
Ta ti, sigo oompaka aantu ya pita 10 000 oya ninga omayindilo gomahala, omanga ya gandja nale omahala kaantu ya pita 600 kOnawa.
Mayola okwa kwashipaleke kutya elelo lyondoolopa olyi na omahala ga gwana, okugandja kaakalimo yawo, onkene kehe ngoka a ninga eyindilo ota ka mona ehala lye mwene. “Onawa onene, natango oku na omahala ogendji ga gwana aantu ayehe ye li mompumbwe mondoolopa yaShakati,” ta popi ngaaka.
Hango okwa kumagidha kehe gumwe e na ehalo lyokukala ena uuthemba wevi lye mwene, a ninge
omayindilo paife.
“Omayindilo gomahala oga mangulukila kehe gumwe kutya iha longo, kutya oha nyangadhala ota vulu okuninga omayindilo, shampa ashike a ndhindhilika kutya oha mono iiyemo iishona nenge ke na sha iiyemo,” ta kumagidha. Kundana sho a li a talele po kOnawa Etine lya zi ko, aantu ayehe ya tembulwa komalukanda ngaashi Eemwaandi noSky, oye li monkalo ombwaanwa , ye li momahala gawo ga yela, mu na omeya nomalusheno.
Mayola okwa kumagidha wo aantu mboka taya tembudhwa opo ya kale taya longele kumwe naambelewa ngele taya lombwelwa ya tembudhwe.
“Aakalimo yamwe ohaya tindile pomahala mpoka, ihe pomahala gamwe oge li moondjila dhokaalita kutya itapu vulu okukalwa nenge pwa tengenekwa tapu tulwa sha, “ta popi ngaaka.
Ta ti, oshigwana nashi uve ko kutya, aluhe ngele to tembudhwa pehala wa adhika po ihe ku na uuthemba wuumwene wehala ndyoka, elelo lyondoolopa itali futu aantu mboka. “Elelo lyondoolopa otali tembudha ashike aantu mboka e taya pewa ehala limwe pamwe pwi ili, ndyoka tali kala ehala lye mwene, lyi li kedhina lye,” ta fatulula ngaaka. Susan Saratiel gwomOnawa okwa ti, shoka ya longelwa kelelo lyondoolopa yaSakati, ine shi uva natango sha ningwa moshilongo muka, onkene oku uvite kutya yo aanelago.
“Okwa li tu li momahala ga kaka, tse yamwe kakwa li tu na nomahala getu tse yene , ihe nena ondi li mehala lyandje mwene lyi li kedhina lyandje, nonda manguluka,’’ ta popi ngaaka.