FNB a yambidhidha nomandoloma giiyagaya
Oshitayimbaanga First National Bank (FNB) mOshakati osha gandja omandoloma gokutula iiyagaya ge li 15 kelelo lyondoolopa yaShakati okugandja kaakalimo yokOnawa.
Omukuluntu gwombaanga yoFNB mOshakati Kristofine Angula okwa ti, oya gandja omandooloma ngoka onga endhindhikiko lyokushunitha moshigwana.
“Oongaga ohadhi gandja oompito dhetaandelo lyomikithi, ihe uuyogoki owo etompelo lyuundjolowele,” ta ti ngaaka. Ta ti, omandoloma ngoka oge ya pula iimaliwa yi thike N$20 000 agehe kumwe.
Mayola gwelelo lyondoolopa yaShakati Leonard Hango okwa ti, ota pandula keyambidhidho lyomandoloma ngoka, oshoka otaga ka kathelwa aakalimo yomolukanda Onawa okukaleka po uuyogoki.
“Omandoloma ngoka otaga kala haga yukwa ngele gu udha kelelo lyondoolopa, notaga ka tulwa momapandaanda,nopopepi naakalupe oshowo aantu ye na uulema,” ta popi ngaaka.
Maria Kawasha gwomOnawa ngoka e na uulema okwa li a tulilwa po ondoloma yiiyagaya, opo a kale e li mehala lye lya yela, ye ita ende iinano iile.
Kawasha natango esiku ndyoka okwa li a pewa okandjugo kopashinane kongushu N$20 000, okuza kehangano tali yambidhidha aantu kaye na iiyemo tali ithanwa Development Workshop.
“Onda pandula nonda mana po iitya nomatatumbula, otashi pula omikalo noondunge dhongushu okuningilwa uuwanawa nda ningilwa nena,” Kawasha ta ti ngaaka.
Selma Nangolo omukalimo gwomOnawa okwa ti, ota pandula peha lyaakalimo aakwawo oshoka omandoloma ngoka otage ke ya kwatha okukala momahala ga yela.
“Oshike tashi ke tu imba okukala tu li momahala ga yela ngele out na mpoka tatu tula iiyagaya. Otwa pandula noonkondo,” ta pendula niitya mbyoka.
Ta ti ndika nalyo ehumo komeho.