Ovanadolongo itava ka pewa vali oikulya tai di kondje
KOMUFALA woshikondo shomavyulonghalo moNamibia Raphael Hamunyela okwa ti omavyulonghalo aeshe moshilongo itaaka tambula vali oinima ngaashi oikulya, eefewa nomiti tadi dilile moshiwana.
Meenghundafana a ninga naKundana Hamunyela okwa hokolola ta ti ovanadolongo itava ka pewa vali oinima ya dja kondje yodolongo shaashi okwa didilikwa oinima ei hai etelwa ovanadolongo okudilila moshiwana hamu kala mu na oingangamwifi, oimbodi ya nyika oulodi noshoyo oinima ikwao i ili ya nyika oshiponga, yee ta ti ovanadolongo ohava etelwa nomiti da nyika oshiponga.
Hamunyela okwa ti oshiima eshi osha kala nokudidilikwa omafimbo mahapu komavyulonghalo aeshe moshilongo, naashi osha kala tashi dana onghandangala yakula.
“Ovapambele ile ookaume nookahewa ngeenge tave uya okutalela po ovanhu vavo ve li modolongo, oto hange pokati komboloto ile moshikuwna mwa tulwa sha shimwe vali sha nyika oshiponga. Shikwao vali otwa didlika ovanhu tava etele ovanadolongo omiti da puka edi di li da nyika oshiponga,” Hamunyela ta ti.
Onghee komufala okwa ti eshi osha eta oshikondo shomavyulonghalo opo shi xulife po oku pitika ovanadolongo va kale tava etelwa oinima yandja kondje moshiwana.
“Okudja nena paife omavyulonghalo otaa kala ashike taa tambula oimaliwa okudilila komunhu keshe e ya okutalela po. Oimaliwa ei otai kala tai pewa ovanambelewa ava hava longo pomavyulonghalo, yee omunadolongo ta popi nee kutya okwa hala okulandelwa shike. Onghee paife oo omukalo hatu ka longifa,” Hamunyela ta ti. Okwa ti oshimaliwa otashi dulu okuyandjwa peke ile shi tumwe komavalulilo ombaanga yomunadolongo keshe shaashi keshe omunadolongo oku na ombaanga yaye oku haku tuminwa oimaliwa yaye.“Ovanambelewa vevyulonghalo ove lilongekida okukala tava yakula ovanadolongo aveshe pamukulo muwa ngaashi oku ka landela ovanadolongo oinima yavo ei va pumbwa ngeenge va yakula oshimaliwa shavo,” Hamunyela ta ti.
Hamunyela okwa ti ovanambelewa voshikondo shomavyulonghalo nava twikile okulonga noudiinini nokukala tave liufa komilandu edi da tulwa po doCovid-19.