Eekila koipangelo yepangelo odihadi omalutu oonakufya
MINISTA wouhaku nonghalonawa Dr Kalumbi Shangula okwa ti oministeli yaye oya taalela eshongo lakula leekila dihadi unene omalutu oonakufya koipangelo yepangelo moshilongo.
Meenghundafana a ninga naKundana Shangula okwa ti eekila depangelo odihadi unene omalutu ovanhu, va kala mo efimbo lile, naashi otashi yandje oupyakadi koministeli opo i kale ihe na onhele ya wana okutula omidimba dovanhu.
Okwa hokolola ta ti unene tuu efimbo eli lidjuu lomukifi woCovid-19 wa tukuka moshilongo nou li tau dipaa ovanhu neenghono, osha eta eshongo lakula koministeli yaye.
Shangula okwa denga omufindo ta ti ovakwapata voonakufya nava kale tava ka tala ko omalutu oonakufya vavo pefimbo opo kukeelelwe eekila diha kale dihadi nayi, unene tuu efimbo eli lidjuu lombuto yoCovi-19 tai dana onghandangala.
Shangula okwa ti omunhu ngeenge okwa fya kombuto yoCovid okwa pitikwa ashike okukala mokila oule womafiku aheyali.
Okwa ti oministeli oya taalela yoo vali eshongo likwao eshi ta ti kutya vati kehangano oku oministeli hai lande oikwafifo yokukwafela ovanhu ve li kepango loCovid-19 ihali longo vali oikwafifo ya wana mopaife. Onghee eshi oshi li omhumbwe yakula oministeli ya taalela.
“Okwa teelelwa ovanhu ashike ava ve na omadidiliko ombuto yoCovid ovo va pumbwa okukala moshipangelo ve li meembete opo ku keelelwe engudumano lovanaudu moshipangelo,” Shangula ta ti.
Onghee omunhu ngeenge okwa monika ombuto yoCovid, ndee oku li monghalo iwa, yee ke na omadidiliko asha, oku na okukala a ya keumbo opo a ka tonatelwe kovakwapata vaye. “Ovanhu nava twikile okukala tave li ufa komilandu doCovid-19 osheshi omikifi ou owa nyika oshiponga nomafyo okwa londa pombada neenghono,” Shangula ta ti.