Kansela woshikandjohoololo shaKatyali a yandja oikutu kovakulupe novanafikola
Kansela woshikandjohoololo shaKatyali Joseph Mupetami okwa yandja oikutu kovakulupe, kovanhu ve na oulema novanafikola vomoshikandjiohoololo shaye, moshitukulwa shaShana. Meenghundafana a ninga naKundana Mupetami okwa hokolola ta ti elalakano lokuyandja oikutu okukwafa ovanhu vomoshikandjohoololo shaye ve li momhumbwe yoidjalomwa unene pefimbo eli loutala u li metifa.
Mupetami okwa yelifa ta ti oinima ei a yandja kovakwashiwana oya dja moshikefa shomombelewa yaye shedina Kukukodolo shokukwafela ovanhu aveshe ve li moluhepo.
“Ondi na oshisho noshiwana, inandi hala moshikandjohoololo shange mu kale mu na omunhu ta mono oixuna tuu nande. Onghee onda kufa etokolo eli lomondjila opo ndi kale nda yandja oikutu kovanhu aveshe ve li momhumbwe moshikandjohoololo shaKatyali,” Mupetami ta ti.
Kansela okwa pa ounona vokofikola vokOnamayongo Primary School oikutu youtalala, opo a kwashipaleke kutya ovanafikola ove na eembidja doutalala ngeenge tava i kofikola efimbo longula.
“Moshikandjohoololo shange kamu na omunhu e na omhumbwe yoikulya tuu nande, shaashi ombelewa yange ohai yandje oikulya komaumbo aa e li momhumbwe yoikulya,” Mupetami ta ti.
Okwa ti oshiwana nashi kwatafane nombelewa yaye ngeenge shi li moupyakadi washa, yee ta yelifa ta ti ombelewa yaye oyoshiwana onghee keshe omunhu okwa manguluka okukala a pula ekwafo kuye. Kansela Mupetami oye umwe a shivika nawa konooli ha longo noudiinini noha kwafele oshiwana moshili. Okwa didilikwa Mupetami ha kala nokuyandja omayakulo mawa kovakalimo vomoshikandjohoololo shaye, naashi oshe mu pa opo a kale kansela waKatyali oule weedula 23 shaashi ovanhu ova panda oilonga yaye eshi iwa. Vahapu ohave mu ufana tava ti omupiya woshiwana shaashi vati okuna olukeno noshiwana.
Mupetami okwa ti oku na okutwikila nokukwafela oshiwana shaye, nokukala ta kongo omakwafo kovanhu koohandimwe opo oshiwana shaye eshi shi li momhumbwe shi kale sha mona ekwafo.
“Natu li ufeni komilandu doCovid-19 shaashi omukifi ou owa nyika oshiponga neenghono,” Mupetami ta ti.