A falwa kohake molwiimbuluma e i longa sho a li kohi yoomvula
SAUDI ARABIA okwa tula kohake omulumentu gumwe molwiimbuluma e yi longa sho a li e na oomvula 17, osho oongundu dhuuthemba womuntu dha ti ngaaka, shika osha ningwa nonando oshilongo shika sha kwashilipaleke kutya osha hulitha po egeelo lyohake.
Mustafa Hashem al-Darwish okwa li a mangwa mo2015 omolwiipotha yi na sha nomahololomadhilaadhilo. Epangelo lyaSaudi Arabia olya ti okwa li a patululilwa iipotha yi na sha nuukulo nokukambadhala okuumba ko epangelo niilwitho koshipundi.
Ashike oongundu dhuuthemba womuntu odha li dha pula opo kaa dhipagwe, tadhi ti epangulo lye kalya li pauyuuki. Amnesty International noReprieve, omahangano ngoka itaaga lalakanene oshimaliwa noge li ompinge nomageelo gedhipago, oga ti omunamimvo 26 al-Darwin okwa li nale a ipatana omapopyo ngoka a li a itaala oshoka anuwa okwa li a dhengwa nokuthiminika a itaale. Epangelo lyaSaudi Arabia inali tya ko sha komapopyo ngaka sigo oompaka.
Shi ikwatelela koshikundaneki shaReuters, iipotha yaal-Darwish oya li ya kwatela mo okukambadhala okweeta omakuyunguto osho wo okukuna ombepo yuutondwe.
Uumbangi owa li wa kwatela mo efano lye a taalela omatanga gegameno, osho wo ekuthombinga lye momakuyunguto ga adha pomulongo mo2011 no2012.
Uuministeli wiikwameni waSaudi Arabia owa ti l-Darwish okwa li wo a kambadhala okudhipaga yamwe yomaanambelewa yegameno, osho oshikundaneki shepangelo sha ti ngaaka. Nonando ongawo, oondokumende dhompangu inadhi ulika nando omasiku iiningwanima mbyoka ya ningwa, shi ikwatelela kuReuters.
Reprieve ta ti ofamili yaal-Darwish inayi pewa uuyelele kombinga yoku mu fala kohake, noye shi tseya ashike okupitila komalungula.
“Otaya ka dhipaga ngiini okanona molwefano lyi mongodhi yako?” osho ofamili ye ya ti ngaaka momushangwa. “Okuza sho a mangwa po otwa kala moluhodhi olunene.” Uuministeli wiikwameni waSaudi Arabia okupitila moshikundaneki shepangelo sho-SPA, owa ti al-Darwish okwa li a mangelwa moDammam, oshilando shi li moshitopolwa shokuuzilo shoka shi na omahooli ofulundundu.
Omumvo gwa zi ko Saudi Arabia okwa li a ti itaka gandja we omageelo gomaso kaantu mboka ya longa iikulumuna manga ya li kohi yoomvula dhuukuluntu, ashike ota ka gandja ashike egeelo lyondholongo lyi li meni lyoomvula 10.
Amnesty naReprieve oya ti oshipotha shaal-Darwin osha li shi na okutalululwa kohi yoveta ompe. Amushanga gwiikwapondje gwa-UK Dominic Raab, okwa li wo naye a popi nkene pwa pumbiwa etalululo lyuuyuuki moSaudi Arabia, ongundu yuuthemba womuntu yoSaudi Human Rights Commission oya ti oshilongo ihashi gandja we omageelo gomaso ogendji.
Ashike nonando ongawo, Reprieve okwa ti Saudi Arabia ngashiingeyi okwa fala aantu kohake mo2021 ye thike pwaamboka ya yi ko mo2020. -BBC