Omatanga gaEritrea otaga ka thiga po Ethiopia mbala
Omatanga gaEritrea ngoka ga kala nokulwa moshitopolwa shuumbangalantu shaTigray moEthiopia otaga ka za mo mbala, osho omukalelipo gwaEthiopia kIigwanahangano (UN) a ti ngaaka.
Taye Atske Sellasie Made okwa ti otaya talaatala ashike omilandu niinima yilwe opo ku tokolwe kutya otaya yi uunake, osho oshikundaneki shedhina Reuters sha lopota ngaaka. Omukalelipo nguka ta ti epangelo lyaEthiopia olyi ilongekidha naandyoka lyaEritrea olya taamba ko oshinima shika, osho Reuters a lopota ngaaka.
Okwa li a popi konima yoshigongi sho-UN Security Council moka omukuluntu gwalyo ta thigi po oshipundi Mark Lowcock a li a ti itashi ka kumitha ngele ondjala yo1984 oya endululwa ngele iikolokosha inayi hula nangele omatanga gaEritrea inaga za mo moshitopolwa moka.
Oshiwike sha za ko, omukuluntu gwo-UN okwa ti omu na ondjala muumbangalantu waEthiopia konima sho omapekaapeko ga ningwa kIigwanahangano ga li ga pitithwa. Epangelo lya Ethiopia olya ikala onkalo yondjala moshilongo.
Tigray okwa kala monkalo ya nyaika okuza sho olugodi lwa tameke muNovemba 2020 pokati komatanga gopakwiita gepangelo osho wo omatanga gaatsindumbo nepangelo. Okwa itaalwa aantu omayovi ya dhipagwa nokonyala ye li omiliona ,7 ya tauka momagumbo gawo.
Iikolokosha mbika yuule woomwedhi heyali moTigray oya mona ayehe mboka taya kutha ombinga, mwa kwatelwa aakwiita yaEritrea, taku dhumwa kutya oya yonagula uuthemba waantu, noya longa omiyonena ngaashi omakwato koonkondo osho wo omadhipago ga kee na henda.