Omukulupe a pila mondunda yokulala
Omulumentu gwoomvula 96 okwa si anuwa sho ondunda moka a li a lala ya yaka omulilo momukunda Omagongati moshitopolwa shaShana mEtitano.
Shi ikwatelela kolopota yiimbuluma yomehuliloshiwike ya pitithwa kopolisi yaNamibia mOsoondaha, oshiponga shika osha li sha holoka potundi 23h20. Nakusa okwa li a tongololwa ongaSakaria Indyala naakwanezimo lye oya li ya tseyithilwa kombinga yeso lye.
Moshininganima shilwe sha yooloka shomundilo, omukiintu okwa li a si sho egumbo lye lya yaka omundilo molukanda lwedhina Schlip moshitopolwa shaHardap.
Oshiningwanima shika osha li anuwa sha holoka lwopotundi 00h30 koongulasha dhOsoondaha. Nakusa anuwa okwa li ha zi oye awike naakwanezimo ye inaya tseyithilwa natango onkundana ndjika yoluhodhi.
Osheetithi shomundilo inashi tseyika natango nomakonaakono gopolisi oge li metifa. Omunamimvo 33, Noni Nikolae okwa li a adhika a endjelela moombuli dhondunda yokulala momukunda Ongha moshitopolwa Ohangwena mOlyomakaya lwopotundi 07h00. Aakwanezimo yaNikolae oya tseyithilwa onkundana yeso ndika nomakonaakono gopolisi otaga tsikile.
Omulumentu gwomimvo 38 okwa li wo a adhika a endjelela moombuli dhondunda ye yokulala momukunda Ouholondema moshitopolwa shaMusati lwopotundi 07h30. Nakusa okwa li a tongololwa kutya oye Gabrile Shipopyeni naakwanezimo lye oya tseyithilwa.
Natango moshiningwanima sheikutho lyomwenyo, omunamimvo 31 Endjala Tshithigona okwa li anuwa a si konima sho a li a pona uuzigo mboka a li anuwa a lumbakanitha ye mwene. Shi ikwatelela kolopota, etompelo lye lyoku ikutha omwenyo inali tseyika na ina thiga po okambaapila kasha, aakwanezimo lye oya tseyithilwa nale.