Tokyo Olympics: Omuuganda a monika oCovid-19 sho ya thiki moJapan

Oshilyo shosipana yaUganda yoOlympic osha monika ombuto yoCovid-19 sho ya thiki moJapan methigathano ndyoka tali ka tameka momasiku 23 Juli. Omaudhano ngaka oga li ga undulilwa komeho omumvo gwa yi, ashike ngashiingeyi otaga yi komeho nonando pe na ekuthiikuthi epe lyoolopota dhoCovid-19 moJapan. Uganda oku na wo aantu oyendji taya kwatwa koCovid-19, shoka sha thiminike epangelo opo li tule po oondjindikila dha kwata miiti mEtitano. Omuuganda nguka inaa tumbulwa kedhina okwa li oshilyo shosipana yaantu omugoyi mboka ya tuntilwa okuudha, osho oolopota da ti ngaaka. Ongundu ndjika ya kwatela mo aadhengingonyo, aadheuli naanambelewa, oya li ya konaakonwa na inayi monika omukithi ngoka sho ya zi moUganda.

Ashike gumwe gomuyo okwa li a monika ombuto sho ya thikile pokapale koondhila kaNarita moTokyo mOlyomakaya, nokwa li a ikalekelwa pehala lyepangelo, osho aanambelewa yaJapan ya lombwele iikundaneki yomoshilongo ngaaka. Yakwawo oya li ya yi nombetsa kOsaka, muuninginino waJapan, hoka taya ka ilongekidhila komeho gomaudhano ngoka gOlympic.

Aauganda oyo ya li oshilongo oshitiyali okuthika moJapan okwiidheulila omaudhano ngoka taga ka tameka muule womwedhi. Osipana yaAustralia yaakiintu yokatanga kokoompadhi oyo ya thiki tango, mesiku 1 Juni.

Aatali naayambidhidhi ya za kiilongo yilwe oya indikwa muudhano mbuka. Etokolo okwa li kwa tegelelwa lyi kuthwe ohela ngele aatali naayambidhidhi yomoshilongo otaya ka pitikwa muupale.

“Okukala mwaa na aatali muupale oshi li hwepo,” osho ookapyoko muunamiti yaJapan ya ti ngaaka. Ashike aanambelewa yalwe yaJapan oya ulika kutya oya hala aatali yomoshilongo ya pitikilwe muudhano mbuka.

Tokyo okwa li a lopota aantu ye li 376 ya kwatwa koCovid, nomuntu gumwe a sa momasiku 20 Juni, ya pitilila naantu 72 okuyelekanitha noshiwike sha za ko, osho oshikundaneki shopaumwene shoThe Asahi Shimbun sha kundaneke ngaaka. Omalolelohogololo miikundaneki yomoshilongo otaga ulike kutya aakwashigwana inaya inekela uudhano mbuka tau ka ya komeho pethimbo ndika otuntila tayi ende kashona.

Konyala oopelesenda ashike 16 dhAajapan ya tuntilwa oCovid-19 sigo oompaka, shi ikwatelela kuuyelele woshikundaneki shoReuters.

Aanambelewa naayiyambi taya longo muudhano mbuka oya tameke okukutha omata gomatuntilo mEtitano. MoUganda, Presidente Yoweri Museveni okwa li a tseyitha ehulithepo lyomalweendo gomoopate, kakele kiihauto ya humbata aapashiyoni, osho wo aaniilonga yomayakulo gomeendelelo nomayakulo galwe ga simana. Okwa li wo a pata oosikola, oounivesiti nomahala gomalongelokalunga uule womasiku 42. Omangambeko ngaka oga li ga simana omolwomukithi tagu endelele, shi ikwatelelela kuMuseveni. Muule wiiwike itatu ya pita, omwaalu gwaantu ya monika omukithi ogwa nuka okuza maantu ye li kohi yethele noku adha omwaalu gwa thika po1 700.

“Otu na aantu oyendji ya kwatelwa miipangelo nomaso ogendji gaamvu yoCovid-19 yomapipi ga yooloka,” presidente ta gwedha po ngaaka.