Equatorial Guinea a futa omunangeshefa omu-SA eemiliona R39.8 eshi emu kwata po shihe li paveta
Omunangeshefa Omusouth Africa ota yolele ketayoo eshi omhangu ya tokola opo omupedupresidente waEquatorial Guinea, Teodorin Nguema Obiang e mu fute oshimaliwa konyala eemiliona R40.
Daniel Janse van Rensburg okwa ninga efimbo ta dundu komhangu ta lwifa omupedupresidente waEquitorial Guinea molwaashi a li a kwatwa nokutulwa modolongo moshilongo osho shi li mondingandinga yaAfrica. Obiang okwa shivika nawa paiwana molwa oku ulika omaliko aya kukeshe oo a hala okutala.
Van Rensberg okwa kwatwa lwoikando ivali moEquatorial Guinea nokutulwa modolongo yaBlack Beach oyo vati ya nyika oshiponga lwoikando ivali, nonande lwoikando aishe ivali ka li a monika ondjo.
Pefimbo olo a kwatwa po okwa hepekwa kolutu nokulengaifwa nokulongelwa oilonga imwe inai tumbulwa i li kondje youfemba womunhu. Omafiku 423 omomafiku 549 oo a kala modolongo okwe a panga koBlack Beach.
Van Rensburg oo e li omukalimo womoGeorge Town shaCape Town, vati okwa li a kwatwa po kelombwelo laxekulu yaObiang Gabriel Mba Bela.
Ashike ota futifa Obiang shaashi oye a li ominista i lile po oveta nelandulafano pefimbo loshiningwanima osho a tulwa modolongo shihe li paveta nokuhepekwa konima yokualukila ko-SA momudo 2015.
Van Rensburg oo a li ta ningi ongeshefa moilongo ya yooloka muAfrica okwa li ta pulwa opo a futwe eemiliona R65 molwa owii oo a ningilwa.
Momudo 2017, omhangu moCape Town oya li ya pula opo omaliko aObiang oo e li moSA a kongwe nokukonekwa apa e li. MEtitano okwa monika ondjo nomhangu oya tokola opo a fute vaRensburg oshikolo osho.
Omupanguli okwa li a popya kutya Van Rensburg okwa ehamekwa nai paliko nopalutu kekwatopo olo lihe li paveta. –Sowetan
Caption: Omhangu yopombada moCape Town oya yandja elombwelo komupedupresidente waEquatorial Guinea Teodor Nguema Obiang opo a fute Daniel Janse van Rensburg, Omusouth Africa oo a li a kwatwa nokutulwa modolongo shihe li paveta nokutulwa modolongo yedina Black Beach mo2013.