Onkalo tayi etitha ohenda mookamba dhoontauki dhomo-USA
POKAMBA yaamboka ya mangwa po poongamba dha-US mombuga yaTexas, uunona wuuntauki ou li monkalo tayi etitha ohenda – moka omikithi dha geya, iikulya hayi vulu okukala ya nika oshiponga nomu na oolopota dhomahepeko gopaihulo, omakonaakono go-BBC ogo uuyelele ga mono mboka sho ya ningi omapulaapulo naaniilonga osho wo aanona.
Moomwedhi ndhika, US okwa mbombolokelwa koontauki naamboka taya kongo uupongekwa okuza mondingandinga yaAmerica. Iikolokosha, omaupyakadhi gopaushitwe osho wo eliko lya nkenenwa molwomukithi gwoCovid-19 oyo tayi hingi aantu oyendji, osho aatseyinawa ya ti ngaaka.
Yamwe oya ti wo elelo lyapresidente Joe Biden ndyoka lyi na ohenda olyo lya etitha oshikumungu shika, nonando egumbo lyepangelo, White House, lya kumagidha oontauki opo kaadhi idhenge ondjila dha uka koongamba dha-US.
Okamba ndjika ya ndhikwa ootenda yi li mokamba yomilitali yaFort Bliss moEl Paso, Texas, olyo egumbo lyopakathimbo lyaanona yepipi lyokamukndapweyu ya adha po2 000 mboka ya taaguluka oongamba dhaUS naMexico oyo ayeke noya tegelela oku ka hangana noofamili dhawo mo-US.
Iizemo yomakonaakono go-BBC oya kwatela mo omapopyo gomahepeko gopaihulo, etukuko lyoCovid osho wo oona, okanona ka tegelela uule woowili ka mone omayakulo gopaunamiti, ompumbwe yiikutu ya yela osho wo aanona ya sa ondjala taya telelekelwa onyama inaayi pya nawa.
Okamba yaFort Bliss oyi na ootenda 12, ndhoka omathimbo gamwe dha edhilila aanona omathele poshikando. Aanona ohaya kala esiku alihe mootenda, haya zi mo ashike uule wowili nenge mbali ya ka dhane, nenge ya ye momikweyo ya ka mone iipalutha.
Aaniilonga oya lombwela oshikundaneki sho-BBC kutya iikulya olundji ohayi vulu okuliwa, ashike omunamimvo 15 ngoka a mangululwa ngashiingeyi okwa ti okwa li haya pewa onyama inaayi pya. “Omathimbo gamwe onyama yondjuhwa oyi na ombinzi, onyama oya tiligana. Itatu vulu oku idhidhimikila ondjala onkene otwa li hatu li, ashike iikulya oya li hayi tu nehama.”
Ootenda odha dhikwa wo opo mu kale omwaalu ogundji gwaanona mboka taya ehama – naanona oya pa ootenda ndhoka oshilukadhina Covid City.
Aanona yamwe mboka ya pumbwa omayakulo guunamiti ihaya pupwa. Moshigongi shaaniilonga sha li ko muMai, moka mwa li mwa kwatithwa omawi gaantu meholamo, omuniilonga gumwe okwa li a popi nkene okanona kamwe ka li taka kungu ombinzi noka li ka pumbwa ekwatho lyopaunamiti lyomeendelelo.
“Oya li ya ti otaye ke mu tuma komwiha,” omuniilonga okwa lopota gumwe gwomaaniilonga ta ti ngaaka. “Otwa tegelele oowili ndatu netata.”
Omunamimvo 15 ngoka a popya no-BBC okwa li a mangululwa omwedhi gwa za ko konima yomasiku 38 mokamba moka. Okwa ti okwa li a kwatwa koCovid-19 mbala sho a thiki mokamba, nokwa ehama noonkondo. Konima sho a aluka, okwa li a tumwa a ka kale motenda moka mwa udha nokwa ehama ishewe.
“Sho twa ka pula omiti oye tu tala nondhino, nohaye tu yolo,” osho okamati hoka inaaka hala okutumbulwa ka ti ngaaka kombinga yaaniilonga yamwe mokamba moka.