Banana baketalizoho batiba mwa Zambezi
Banana baketalizoho nebatibile mabapa ni nuka ya Chobe, lonji mone bakwezi haitiba mizuzunyana imano siya likamba la Nakabolelwa. Yabona zabubangoki mwasikiliti sa Zambezi Evans Simasiku nanatifalize taba yeo. Simasiku naize lonji ya sicaba yene libile kwa Impalila ilumelezwi kulonga batu basupile, kono nelongile balishumi kabalobapeli kungelela cwalo ni mufuluhi wayona. Naekelize kuli lonji netezi libyana, kakuli bayahi nebaile kwa Katima Mulilo kuyo leka. Bane bakwezi mwalonji nekuna ni cwalo ni mapokola basilezi, nibabañwi basupile bane bapilile kasamulaho akutapa nikutusiwa kibafuluhi babañwi bamalonji.
Bane bapilile bamwahala lilimo liketalizoho ni lilimo zemashumi aketalizoho kazepeli. Bane batimezi bao lilimo zabona nelisika patalazwa nebalumelwa kuba limembala zalubasi lululiñwi, mi nebazibahalizwe kuba Matengu Matengu, Lumba Matengu, Sikanda Muluti, Simasiku Muluti ni Sikanda Sikanda. Simasiku naize “sene sitisize kozi neli kulonga kufiteleza tikanyo – bakeñisa kuli nekuna ni moya, lonji nepalezwi kukwanisa buima bone ilongile. Kelezo yaka iya kwabafuluhi bamalonji kuli basike batalima masheleñi abafumana. Baswanezi kutalima silelezo yabatu.”
Muyemeli wasilalanda sa Kabbe ya Mbowela John Likando naize kezo yeo neli yemaswe niye tomohisa pilu. “Kakuba muuso niluna luna ni mulatu hala taba yene ezahezi, kakuli hakuna nzila yasicaba, mi batu baluna bakena mwakozi. Linuka zaluna nizona halina kamaiso. Batu balonga mobalatela, mi babañwi bafuluha basina hande lyano,” nabulezi. Hana buzizwe zalonji ya Kapelwa Kabajani, Likando natolokile kuli nesabeleki kakuli mufuluhi wayona nasiyo. Naekelize kuli bayahi batabela kusebelisa malonji amanyinyani kakuli halyehi mwamezi.