Bayahi ba Zambezi basaba masole ba Botswana
BAYAHI basikiliti sa Zambezi basakatazwa kisabo yakupotela nuka ya Chobe, kakuli hakuna sepiso yakuli bakayokuta bapila, bakeñisa kubateñi kwamasole banaha Botswana, mubusisi wasikiliti sa Zambezi Lawrence Sampofu nabulezi. Mwangambolo cwalecwale ni mutayi wamakande waNampa, mubusisi natolokile zasabo bayahi basikiliti batalimani niyona habanze balibelezi sepiso kuzwelela kwamibuso yemibeli.
“Hakutaha kwasilelezo silalanda hasiyo hande. Batu bainzi mwasabo. Taba yacwanuñu yene bihilwe neli mwakweli ya Kandao yabapoti bane batukufazwa kimasole banaha Botswana, hane bali mwalonji kuikatulusa.
Nihakusina zeñwi zebihilwe batu basali mwasabo, mi buñata habasaya kwanuka,” nekubulezi Sampofu.
Naize kuna ni maikuto akutokwa sakueza, kakuli hakuna sakona kueza famayemo asikiliti, sina ofesi yahae ni likhuta zasizo haba libelezi musha kuzwelela kwaliluko la litaba zakwanda naha.
Sampofu hakiyena feela yana fitisize manzwi alipilaelo, membala wandu yamilao kuyemela kopano ya NEFF Kalimbo Iipumbu, cwanuñu nakile añolisa kuambola taba yababa pila kwamiseto yalinaha zepeli.
Nakupile bapangi bamulao kufumana milao yatatululo yekaikabelwa kilinaha zepeli, ili Namibia ni Botswana kuli kufumanwe tatululo nikukutiseza kozo yakamita kwamiseto. “Namibia ilukuluhile, kono buñata bwabayahi habapili mwakozo, nihaike kuzamaya balukuluhile kwamiseto mwasikiliti sa Zambezi. Batu baluna bazwelapili kusabiswa kibanaha Botswana, luswanela kufa mayemo aluna kakuba ndu ya milao,” nabulezi
Nabulezi kuli miseto ni haizibahala, bayahi banaha Namibia bazwelapili kutukufazwa, mi babapila mabapa ni miseto haba ikoli miselo yatukuluho, sina mokuñolezwi mwamutomopuso wanaha Namibia.
Kakuswana muyemeli wasilalanda sa Kabbe ya Mbowela John Likando, nañolisize taba yeswanela kuambolwa mwandu yamilao yabubeli, kuamana nibuiketo bwababapila kwamukulela wanuka ya Chobe.
Likando naize sicaba ni bapoti bazwelapili kusabiswa ni kutukufazwa kimasole banaha Botswana mwasikiliti sa Zambezi, sihulu babapila kapa babaipumana kwamukulela wanuka ya Chobe.