Ouministeli wouhaku u na omhumbwe yovanailonga voundjolowele
Ominista youhaku Dr. Kalumbi Shangula oya ti oministeli yaye oi na omhumbwe yovanailonga voundjolowele inava wana unene tuu pefimbo eli lombuto yoCovid-19 ili tai dana onghandangala moshilongo.
Meenghundafana a ninga naKundana minista Shangula okwa hokolola ta ti ovapangi ohava longo noudjuu paife shaashi koipangelo oha ku ya omwaalu vovanhu vahapu a va va kwatwa koCovid-19, onghee naasho oshi li eshongo linene koministeli yaye shaashi opena omhumbwe yovanailonga.
“Ohandi indile ovanhu aveshe a va veli hongela omaifano opauhaku opo va ninge omaindilo vo vashiive oku mona oilonga shaashi otwa pumbwa ovanailonga vahapu koipangelo moshilongo a shishe pefimbo eli lidjuu lombuto tai dipaa ovanhu neenghono,” Shangula ta ti.
Okwa ti oilonga otai ka kala ipu moipangelo ngeenge muna ovanailonga va wana opo va dule oku kwafela ovanaudu noupu.
“Oto hange omupangi umwe oya takwafele ovanaudu nande ove li 15 pefimbo limwe, ile to hange koshaala kuna eike ondokotolo imwe. Onghee oshi li eshongo lakula neenghono koipangelo shaashi ovapangi neendokotola otava longo unene noudjuu,” Shangula ta ti.
Oshivike sha djako omukulunhuwiliki wouhaku moshitukulwa shaShikoto Nghipangelwa Josua okwa ya meenghundafana naKundana eshi ahokolola ta ti oshipangelo shaNandjokwe oshina omhumbwe yovanailonga vopaundjolowele ina va wana oku kwafela ovanaudu pefimbo eli lombuto yoCovid-19 tai dana onghandangala moshilongo.
Josua okwa ti keshe efiku ovanhu a va vakwatwa kombuto yoCovid19 oha ve u ya koshipangelo shaNandjokwe veli momwaalu muhapu neenghono, ndele ka pena ovanailonga va wana oku kwafela omwaalu vovanhu ou uli pombada.
Omukulunhuwiliki wohauku moshitukulwa shaOtjozondjupa Gebhardo Timotheus naye okwa ya meenghundafana naKundana eshi ahokolola ta ti oshitukulwa shaye nasho shili momhumbwe yovanailonga koipangelo.